Nashik Recruiting: नाशिक महापालिकेत विविध पदांसाठी भरती; २४ वर्षांपासून रखडलेल्या नोकरभरतीला अखेर मुहूर्त

Nashik News : गेल्या २४ वर्षांपासून रखडलेल्या नाशिक महापालिकेच्या भरतीला अखेर मुहूर्त लागला आहे. नाशिक महापालिकेत पुढील १५ दिवसांतच दोन विभागात भरती होत आहे. त्यामुळे नाशिकच्या अनेक होतकरू तरूणांसाठी ही सुवर्णसंधी आहे. पालिकेत ५०० हून अधिक पदांसाठी ही भरती होत आहे.

मिळालेल्या माहितीनुसार नाशिक पालिकेत अग्निशामक आणि वैद्यकीय अशा दोन विभागात विविध रिक्त पदे आहेत. गेल्या २४ वर्षांपासून ही रिक्त पदे भरलेली नाहीत. यात अग्निशामक विभागाची ३४८ तर आरोग्य आणि वैद्यकीय सेवा विभागातील ३५८ पदांसाठी भरती होणार होत आहे. तसेच यात आणखीन एक दिलासा म्हणजे सेवा प्रवेश नियमावली मंजूर झाल्यावर उर्वरित २ हजार पदांची भरती (Recruitment) प्रक्रिया राबवली जाणार आहे.

नाशिक (Nashik) महापालिकेत सध्या एकूण ७०६ रिक्त पदे भरण्यात येत आहेत. पुढील १५ दिवसांमध्येच ही भरती प्रक्रिया पूर्ण करण्याचे आदेश नाशिक पालिका आयुक्तांनी दिले आहेत. कोरोना महामारीमुळे भरती लांबणीवर पडली होती. तसेच या काळात अनेक तरूणांच्या नोकऱ्याही गेल्या. त्यामुळे तरूणांसाठी ही मोठी संधी असल्याचे म्हटले जात आहे.