Samruddhi Mahamarg : सावधान! समृद्धी महामार्गावरून प्रवास करताय; अपघातांचं नवं कारण आलं समोर?

Samruddhi Mahamarg Latest News : मोठा गाजावाजा करत नागपूर - मुंबई असा ७०१ किमीचा ग्रीनफिल्ड सुपर एक्स्प्रेस कॉरिडॉर बनविण्यात आला. त्याचा पहिला टप्पा नागपूर ते शिर्डी सुरू ही करण्यात आला. सुरुवातीला सांगण्यात आलं की महामार्ग अतिशय वेगवान वाहनांसाठी एक्सेस कंट्रोल असा असेल मात्र आता याच माहामार्गाची सुरक्षा कशी धोक्यात आली आहे ते समोर आलं आहे.

समृद्धी महामार्गावरून (Samruddhi Mahamarg) प्रवास करताना कुठेही महामार्गावर वाहन थांबवता येत नाही कारण, थांबलेल्या वाहनांवर मागून येणाऱ्या भरधाव वाहनांचा अपघात होऊ शकतो असा नियम असताना देखील या महामार्गावर अनेक ठिकाणी अनधिकृत रित्या हॉटेल्स आणि फूड स्टॉल्स सुरू केले आहेत.

त्यामुळे महामार्गावर ट्रक, कार थांबून या ठिकाणी समृद्धी महामार्गावरील वाहतुकीसाठी अडथळा ठरत असल्याचं चित्र मेहकर जवळील डोनगाव पेट्रोल पंप परिसरात दिसत आहे. वेगवान महामार्गावर थांबलेल्या वाहनांवर धडकल्याने गेल्या आठवड्यात एक मोठा अपघात (Accident) झाला होता.

मात्र तरीही रस्ते विकास महामंडळाच्या अधिकाऱ्यांनी यावर कुठलीही कारवाई केली नासल्याच समोर आलं आहे. विशेष म्हणजे हे फूड स्टॉल्स महामार्गाच्या सुरक्षा भिंतीच्या आत असल्याने याठिकाणी अनेक वाहने थांबत असतात आणि अशा वाहनांवर मागून येणारी भरधाव वाहने धडकून मोठा व गंभीर अपघात होण्याची शक्यता आता निर्माण झाली आहे.