Satyajeet Tambe : सत्यजित तांबेंनी अशोक चव्हाणांच्या पाया पडून घेतले आशिर्वाद, चव्हाणांनी...

Satyajeet Tambe : आज विधान परिषदेच्या नवनिर्वाचित आमदारांचा शपथविधी पार पडला. यावेळी नाशिक विभाग पदवीधर मतदारसंघाचे नवनिर्वाचित आमदार सत्यजित तांबे यांनी आमदाराकीची शपथ घेतली. यावेळी काँग्रेसचे ज्येष्ठ नेते अशोक चव्हाण आणि विरोधी पक्षनेते अजित पवार यांची उपस्थिती होती.

सत्यजित तांबे यांनी यावेळी काँग्रेसचे नेते अशोक चव्हाण यांच्या पाया पडून आशिर्वाद घेतले. अशोक चव्हाण यांनी देखील त्यांची गळाभेट घेतली आणि त्यांचे अभिनंदन केले. सत्यजित तांबे यांनी अजित पवार यांची देखील भेट घेतली. या कार्यक्रमाला काँग्रेसचे ज्येष्ठ नेते बाळासाहेब थोरात आजारी असल्यामुळे उपस्थित राहू शकले नाहीत.

यावेळी औरंगाबाद शिक्षक मतदारसंघाचे नवनिर्वाचित आमदार विक्रम काळे आणि सत्यजित तांबे यांच्या कार्यकर्त्यांनी जोरदार घोषणाबाजी केली. 'पहिले दादा अजित दादा, दुसरे दादा सत्यजित दादा' अशा घोषणा यावेळी कार्यकर्त्यांनी दिल्या.

यावेळी बोलताना सत्यजित तांबे म्हणाले की, या कार्यक्रमाला थोरात साहेब आणि माझे वडिल यांना उपस्थित राहता आले नाही. आता मी जनतेच्या कामांना सुरुवात करणार आहे. काँग्रेसविषयी बोलताना ते म्हणाले की, मी माझ्या भावना काँग्रेस श्रेष्ठींना कळवल्या आहेत. मी अपक्ष निवडणून आलो आहे आणि आता जनतेच्या कामाला सुरुवात करणार आहे.