शहाजीबापू पाटील यांनी केली अजित पवारांवर बोचरी टीका; म्हणाले, इंदूरीकर महाराजांचे...'

shahaji bapu patil News : सांगोल्याचे शिवसेनेचे बंडखोर आमदार शहाजीबापू पाटील यांनी राष्ट्रवादीचे नेते व विरोधी पक्षनेते अजित पवार यांच्यावर निशाणा साधला आहे. सतत सत्तेवर राहण्याची सवय असल्याने त्यांना आता विरोधी पक्ष नेतेपद जुळत नाही, असे म्हणत अजित पवारांना (Ajit Pawar) आता ओशोच्या भाषणाच्या आणि इंदूरीकर महाराजांच्या किर्तनाच्या कॅसेट ऐकण्याशिवाय दुसरं काम राहिलं नाही, अशी बोचरी टीका शहाजीबापू पाटील (ShahajiBapu Patil) यांनी केली.

दसरा मेळाव्याच्या पार्श्वभूमीवर आमदार शहाजीबापू पाटील यांनी आज पंढरपुरात माध्यमांशी संवाद साधला. यावेळी त्यांनी उद्धव ठाकरे, अजित पवार, निलम गोऱ्हे यांनाही टोले लगावले. दसरा मेळाव्यात पहिल्यांदा उद्धव ठाकरे आणि नंतर मुख्यमंत्री एकनाथ शिंदे यांचे भाषण ऐकणार असे अजित पवार म्हणाले होते. त्यावर आमदार शहाजीबापू पाटील यांना विचारले असता, शहाजी बापू म्हणाले, 'अजित पवार यांना आता दुसरे काम राहिले नाही, त्यांनी दररोज ओशोच्या भाषणाच्या आणि इंदूरीकर महाराजांच्या कीर्तनाच्या कॅसेट ऐकाव्यात असा टोलाही त्यांनी लगावला.

'अजित पवारांच्या मनातलं अजूनही कोणाला कळालं नाही. अजित पवार आणि माझे संबंध जिव्हाळ्याचे आहेत. तरीही शरद पवार साहेबांना त्यांच्या मनात काय चालय हे कळलं नाही, तिथे मला काय कळणार ? अजित पवार कधी झटका देतील काय सांगता येत नाही, असा खोचक टोलाही आमदार पाटील यांनी लगावला.