Ramdas Kadam : रामदास कदम यांचा अनिल परब यांच्यावर गंभीर आरोप; म्हणाले, 'राष्ट्रवादीच्या माजी आमदाराला...'

जितेश कोळी

Ramdas Kadam News : महाविकास आघाडीतील माजी परिवहन मंत्री व शिवसेना नेते अनिल परब यांच्यावर पुन्हा एकदा शिंदे गटातील नेते रामदास कदम यांनी जोरदार टीका केली आहे. 'राष्ट्रवादीच्या पडलेल्या माजी आमदाराला निधी देऊन आमदार योगेश कदम यांना राजकारणातून संपवण्याचा डाव खेळला होता, असा आरोप रामदास कदम यांनी माजी मंत्री अनिल परब यांच्यावर केला. (Latest Marathi News)

शिंदे गटाचे वरिष्ठ नेते, माजी आमदार रामदास कदम यांनी अनिल परब यांच्यावर जोरदार हल्लाबोल केला. जामगे येथील निवासस्थानी पत्रकारांशी संवाद साधताना रामदास कदम यांनी ही टीका केली आहे.

'महाविकास आघाडी सरकारच्या काळात माझा मुलगा दापोलीत शिवसेनेचा विद्यमान आमदार असतानाही अनिल परब यांनी राष्ट्रवादीच्या पडलेल्या माजी आमदाराला निधी देऊन शिवसेना आमदार योगेश कदम यांना राजकारणातून संपवण्याचा डाव खेळला होता, असा आरोप गंभीर आरोप रामदास कदम यांनी केला.

मराठी भाषेला अभिजात भाषा दर्जावरून पटोले यांना कदम यांचे उत्तर

मराठी भाषेला अभिजात भाषेचा दर्जा का मिळाला नाही असा सवाल उपस्थित करणारे काँग्रेसचे प्रदेशाध्यक्ष नाना पटोले यांना रामदास कदम यांनी जोरदार उत्तर दिले.

मराठी भाषेसाठी राजकारणाचे जोडे बाजूला ठेवा. सर्वांनी एकत्र येत विधिमंडळात एकमताने ठराव मंजूर केला तर केंद्राकडे हा प्रस्ताव पाठवता येईल. पटोले यांनी अधिवेशनात हा मुद्दा उपस्थित का केला नाही, असा उलट सवाल करत महाविकास आघाडी सरकारच्या काळातच अजित पवार यांनी एसटी महामंडळाचे विलीनीकरण होऊ शकत नाही हे सांगितले होते. त्यामुळे नाना पटोले यांनी अजित पवार यांनाच हा प्रश्न विचारावा असे रामदास कदम म्हणाले.