चोरट्यांनी उडविली बाळापूरकरांची झोप; हातात लाठ्या-काठ्या घेऊन नागरिकांचा पहारा

हिंगोली : हिंगोली (Hingoli) जिल्ह्यात मध्यरात्री साखरझोपेत असलेल्या महिलांच्या गळ्यातील दागिने पळवणारे चोरटे सक्रीय झाले आहेत. या चोरट्यांनी नांदेड, हिंगोली आणि यवतमाळ (Yavatmal) जिल्ह्यातील अनेक तालुक्यातील गावात धुमाकूळ घातल्याने खळबळ उडाली आहे. मात्र पोलिसांना (Police) या चोरट्याचा शोध लागत नसल्याने आता गावकऱ्यांनीच, आपल्या गावातील नागरिकांचे संरक्षण करण्यासाठी गावात खडा पहारा सुरू करत गस्त घालण्यास सुरुवात केली आहे. गावातील युवक हातात लाठी काठी व बॅटरी घेऊन गावाची सुरक्षा करत आहेत.

दोन दिवसांपूर्वी कळमनुरी तालुक्यातील आखाडा बाळापूर (Akhada Balapur) गावातील रहिवाशी गौतम वाठोरे आणि संदीप चव्हाण यांच्या घरावर चोरट्यांनी (Thief) डल्ला मारला होता. मध्यरात्रीच्या सुमारास आलेल्या या चोरट्यांनी घरातून सोने चांदी तसेच रोख रक्कम लंपास केली होती. दरम्यान, चोरटे चोरीसाठी घरात शिरले असताना त्यांची घरातील कुटुंबियांसोबत झटापट झाली. या झटापटीत एका महिलेच्या कानाला दुखापत झाली. याप्रकरणी बाळापूर पोलीस ठाण्यात गुन्हा दाखल करण्यात आला होता.

मात्र, गुन्हा दाखल होऊन 10 दिवसांपेक्षा जास्त कालावधी लोटला, तरीही चोरटे शोधण्यास पोलिसांना अपयश आले. अशात आता गावातील गावकऱ्यांनी गावाच्या सुरक्षेसाठी स्वत:च गावाचे रक्षण करण्याचा निर्णय घेतला आहे. चोरटे पुन्हा गावात शिरता कामा नये याची दक्षता घेत, गावातील युवक हातात लाठी काठी आणि बॅटरी घेऊन गावाची सुरक्षा करत आहेत.

दुसरीकडे चोरट्यांचा शोध घेण्यासाठी आखाडा बाळापूर पोलिसांच्या पथकासह स्थानिक गुन्हे शाखेचे पथक रवाना करण्यात आले आहेत. या चोरट्यांना लवकरच जेरबंद करण्यात येणार असल्याची माहिती हिंगोली पोलीस दलातर्फे देण्यात आली आहे.

Edited By - Satish Daud