आमदार भरत गोगावले आणि त्यांचा मुलगा विकास गोगावले यांना जीवे मारण्याची धमकी

रायगड : एकनाथ शिंदे यांनी शिवसेनेच्या ४० आमदारांसह बंडाचा झेंडा फडकवल्यानंतर राज्यात ठाकरे सरकार कोसळलं. त्यानंतर ठाकरे गट आणि शिंदे गटात राजकीय संघर्ष सुरु झाला. शिंदे गटात रायगडमधील शिवसेनेच्या आमदारांचा समावेश करण्यात आमदार भरत गोगावले यांचा मोलाचा वाटा आहे. त्यामुळे मुख्यमंत्री एकनाथ शिंदे (Eknath Shinde) यांनी गोगावले यांना प्रतोदपदाची जबाबदारी दिलीय. परंतु, शिवसेना आणि शिंदे गटात वादाची ठिणगी पेटल्यापासून राजकीय वर्तुळातून धक्कादायक बातम्या समोर येत आहेत. भरत गोगावले (Bharat Gogawale) यांचा मुलगा विकास गोगावले यांना जीवे मारण्याचे धमकीचे फोन गेल्या दोन दिवसांपासून येत आहेत. आमदार भरत गोगावले आणि विकास गोगावले यांना पाच दिवसात ठार मारण्याची धमकी देण्यात आलीय. गावदेवी पोलीस ठाण्यात याप्रकरणी तक्रार दाखल करण्यात आली आहे.