Hingoli Sugar Company : शेतकऱ्यांचे थकीत पैसे परत मिळणार?; हिंगोलीचा टोकाई साखर कारखाना जप्त करण्याचे आदेश

Sugar Company : हिंगोली जिल्ह्यातील वसमत तालुक्यात हजारो ऊस उत्पादक शेतकऱ्यांना आर्थिक अडचणीत आणणाऱ्या टोकाई साखर कारखाना व्यवस्थापनाला राज्य सरकारने दणका दिला आहे. १ जानेवारी ते २८ फेब्रुवारी दरम्यान विक्री केलेल्या शेतकऱ्यांच्या उसाचे २२ कोटी रुपये थकवल्याप्रकरणी राज्याच्या सहकार आयुक्तांनी हिंगोलीच्या जिल्हाधिकाऱ्यांना पत्र देत टोकाई साखर कारखाना जप्त करण्याचे आदेश दिले आहेत. (Sugarcane farmers)

दरम्यान जिल्हाधिकाऱ्यांना हे पत्र प्राप्त झाले असून जिल्हा प्रशासन या पत्रानंतर आता जप्तीची कारवाई करणार आहे. राष्ट्रवादीचे आमदार चंद्रकांत नवघरे यांनी याबाबत विधिमंडळात सहकार मंत्री अतुल सावे यांना याबाबत सवाल केला होता. त्यानंतर सहकार आयुक्तांकडून ही कारवाई करण्यात आली आहे. विशेष म्हणजे हिंगोलीच्या वसमतमधील टोकाई सहकारी साखर कारखाना हा भाजपच्या ताब्यात आहे. या कारखान्यावर भाजपचे नेते शिवाजीराव जाधव यांचे वर्चस्व आहे. मात्र आता शेतकऱ्यांचे पैसे थकल्याप्रकरणी भाजपच्या ताब्यात असलेल्या या कारखान्यावर जप्तीची कार्यवाही करण्यात येणार आहे.

परंतु कारखाना जप्त करण्याऐवजी शेतकऱ्यांचे पैसे तातडीने देण्याची मागणी आमदार राजू नवघरे यांनी केली आहे. तसेच याबाबत आपण शेतकऱ्यांचे पैसे तातडीने देण्यासाठी राज्य सरकारकडे मागणी करणार असल्याचं त्यांनी सांगितलं आहे. सध्या चालू हंगामातील २३.३० कोटींची थकित बिल शेतकऱ्यांना देणे शक्य नसल्याचे पत्र टोकाई कारखान्याने साखर आयुक्तांना दिले होते.

अपार कष्ट करून, शेतात घाम गाळून नेतकऱ्यांनी ऊस पिकवला मात्र हा ऊस कारखान्याला दिल्यावर त्यांनी त्याचा मोबदला दिला नाही. यामुळे शेतकरी हवालदील झालेत. त्यामुळे आमदार नवघरे यांनी शेतकऱ्यांचा हा प्रश्न सभागृहात उपस्थित केला होता. शेतकऱ्यांना मोबदला तर मिळालाच नाही, शिवाय बगॅस आणि मोलासेस देखील खुल्या बाजारात विकण्यात आलेत. याची देखील चौकशी करून शेतकऱ्यांना न्याय द्यावा, असं नवघरे यांनी म्हटलं होतं. त्यावर आता सहकार आयुक्तांनी हिंगोलीचा टोकाई साखर कारखाना जप्त करण्याचे आदेश दिले आहेत.