सावधान! अकोल्यात पुन्हा कोरोनाचा शिरकाव; तब्बल दोन महिन्यानंतर आढळला रुग्ण

अकोला : मागील दोन महिन्यांपासून जिल्ह्यातून हद्दपार झालेल्या कोरोनाने (Corona) पुन्हा एकदा अकोला (Akola) शहरात पाऊल ठेवलं आहे. शहरातील एका संदिग्ध रुग्णाचा वैद्यकीय अहवाल कोरोना पॉझिटिव्ह (Corona Positive) आला आहे. संबंधित रुग्ण हे वैद्यकीय क्षेत्रात कार्यरत एक ज्येष्ठ नागरिक असून महापालिकेच्या हद्दीतील रहिवासी आहेत. अचानक कोरोना रुग्ण आढळून आल्याने शहरात खळबळ उडाली आहे. (Akola Corona Updates)

पॉझिटिव्ह आढळून आलेल्या रुग्णाची प्रकृती सध्या ठीक असून 5 दिवसानंतर त्यांची पुन्हा आरटीपीसीआर चाचणी करणार आहे. एका खासगी प्रयोगशाळेतून सबंधित रुग्णाचा पॉझिटिव्ह अहवाल प्राप्त झाला आहे. काही दिवसांपासून जिल्हा कोरोनामुक्त असला, तरी शासकीय वैद्यकीय महाविद्यालयातील प्रयोगशाळेतून आरटीपीसीआर नमुन्यांची चाचणी सुरू आहे.

दरम्यान, मंगळवारी 32 जणांचे कोरोना तपासणी अहवाल आले. यामध्ये एक रुग्ण पॉझिटिव्ह आढळून आला असून इतर 31 रुग्ण निगेटिव्ह आले आहेत. त्यामुळे जिल्ह्यात आतापर्यंत आढळलेल्या कोरोना पॉझिटिव्ह रुग्णांची संख्या 65,180 इतकी झाली आहे.

Edited By - Satish Daud