Wardha News: गौण खनिजाचे अवैध उत्खनन; पोकलॅनसह दोन टिप्पर जप्त

चेतन व्यास

वर्धा : सावंगी नजीकच्या पालोती परिसरात असलेल्या स्टोन क्रशरच्या खदानीवर अवैधरित्या गौण खनिजाचे उत्खनन सुरु होते. यावर महसूल विभागाच्या (Revenue Department) पथकाने छापा मारला असता पोकलॅनच्या सहाय्याने अवैधरित्या उत्खनन सुरु असल्याचे दिसून आले. यात महसूल कर्मचाऱ्यांनी दोन टिप्परसह पोकलॅन मशीन जप्त केले आहे. (Letest Marathi News)

मौजा पालोती साझामधील जामठा (Wardha) शिवारातील पूजा चंद्रकांत दौंड यांच्या नावे असलेल्या शेत जमिनीमध्ये कोणतीही परवानी नसताना गौण खनिजाचे अवैध उत्खनन सुरु होते. याबाबत माहिती मिळताच जिल्हा खनिकर्म अधिकारी अतुल दौड, तहसीलदार रमेश कोळपे, नायब तहसीलदार बाळू भागवत, बालाप्रसाद ढोणे, आशिष सहारे, विजय झाडे, देवेंद्र राऊत, तुषार शिंदे, बंडू सागर यांनी खदानीवर छापा मारला. यावेळी रुखमाई स्टोन क्रशरचे दोन टिप्पर दिसून आले.

चालकांनी दिली कबूली

अधिकाऱ्यांनी टिप्पर चालकांविरुद्ध कारवाई करुन पोकलॅनसह दोन्ही टिप्पर जप्त केले. दोन्ही टिप्पर चालकांनी अवैधरित्या उत्खनन केल्याची कबूली यावेळी अधिकाऱ्यांना दिली. जिल्हा खनिकर्म अधिकाऱ्याच्या नेतृत्वात करण्यात आलेल्या या कारवाईमुळे अवैध उत्खनन करणाऱ्यांचे धाबे दणाणले आहे.