Ambarnath News: शहरात महिला चोरट्यांचा सुळसुळाट; हातचलाखी सीसीटीव्हीत कैद

अजय दुधाणे

Ambarnath News : अंबनाथमध्ये चोरीच्या घटनांचे प्रमाण वाढत चालले आहे. एका ज्वेलर्स दुकानामध्ये दोन महिलांनी हातचलाखी करत दागिने लंपास केले आहेत. सदर घटना सीसीटीव्ही कॅमेऱ्यात कैद झाली आहे. या बाबत दुकानदाराने पोलिसांत सदर घटनेची तक्रार नोंदवली असून पोलिस या महिलांचा शोध घेत आहेत. (Latest Ambernath Crime News)

प्राप्त माहितीनुसार, अंबरनाथ पश्चिमेच्या बांगडी गल्लीत रेडवाल ज्वेलर्स दुकानात ही घटना घडली. या दुकानात दोन महिला आल्या आणि त्यांनी पैंजण दाखवण्यास सांगितलं. त्यानुसार दुकानात काम करणाऱ्या मुलाने आणि २ मुलींने या दोघींना दोन बॉक्समधले पैंजण काढून दाखवले. त्यावेळी पैंजण पायाला लावून निट येत आहेत की नाही या बहाण्याने एक महिला पैंजण घेऊन खाली वाकायची आणि पुन्हा ते पैंजण टेबलावर ठेवून द्यायची.

पैंजण बघून झाल्यावर एकही पैंजण पसंत न करता या महिला निघून गेल्या. यानंतर दुकानदाराने दुकानातील स्टॉक मोजला असता त्यात १२ पैंजण कमी असल्याचं आढळलं. त्यामुळं सीसीटीव्ही चेक केलं असता याच दोन महिलांनी हातचलाखीने हे पैंजण चोरल्याचं स्पष्ट झालं. ही महिला ज्यावेळी पैंजण पायाला लावून बघण्यासाठी खाली वाकायची, तेव्हा ती हातचलाखीने एका पैंजणाखाली ४-५ पैंजण लपवून खाली वाकायची. मात्र वर येताना एकच पैंजण घेऊन वर येत टेबलावर ठेवायची.

अशी हातचलाखी करत तिने १२ पैंजण चोरल्याचं स्पष्ट होताच ज्वेलर्स मालकाने पोलीस ठाण्यात तक्रार केली. त्यानुसार पोलिसांनी गुन्हा दाखल करत तपासाला सुरुवात केली आहे. झालेल्या नुकसानामुळे दुकानदार चिंतेत आहे.