Yashomati Thakur : शिंदे- फडणवीस यांचं Power Hungry सरकार

- अमर घटारे

अमरावती : सरकार स्थापन होऊन एक महिना झाला आहे. अजूनही मुख्यमंत्री एकनाथ शिंदे (eknath shinde) यांना मंत्रिमंडळ नेमायची डेरिंग नाही. संपूर्ण राज्यांतील (maharashtra) सर्व जिल्ह्यात पालकमंत्री विना पाेरके झालेत. संपूर्ण राज्य दोन मंत्री चालवत आहे. राज्यातील जनतेचं सरकार मायबाप असते मात्र या सरकारचा अजूनही ठाव ठिकाणा नाही. महाराष्ट्र बेवारास झाला आहे अशी टीका आमदार यशाेमती ठाकूर (yashomati thakur) यांनी मुख्यमंत्री एकनाथ शिंदे आणि राज्य सरकारच्या कारभारावर केली. (Yashomati Thakur Latest Marathi News)

अमरावती ग्रामीण काँग्रेसच्या वतीने आज (बुधवार) जिल्हाधिकारी कार्यालयाबाहेर जोरदार निदर्शने करण्यात आली. त्यावेळी आमदार यशाेमती ठाकूर या बाेलत हाेत्या. आमदार ठाकूर म्हणाल्या अमरावती जिल्ह्यात तीन लाख हेक्टरच्या वर शेतीचे पावसामुळे नुकसान झाले आहे. शेतकऱ्यांना अनेक ठिकाणी दुबार पेरणी करावी लागली. काही ठिकाणी पुराच्या पाण्यामुळे शेती खरडून गेली तर काही ठिकाणी संपूर्ण संपूर्ण शेती पाण्याखाली आल्यामुळे शेतकऱ्यांचं कापूस, तूर, सोयाबीन पिकाचे मोठं नुकसान झालं आहे. (Amravati News)

राज्य सरकार (दोन मंत्र्यांचं) शेतकऱ्यांकडे दुर्लक्ष करीत आहे असे सांगून ठाकूर यांनी अमरावतीच्या संपूर्ण जिल्ह्यात सरसकट ओला दुष्काळ जाहीर करावा अशी मागणी केली आहे. यावेळी आमदार ठाकूर यांनी मागण्यांचे निवेदन जिल्हाधिकारी यांना दिले. त्यानंतर आंदाेलकांनी जिल्हाधिकारी कार्यालया बाहेर मुख्यमंत्री एकनाथ शिंदे व उपमुख्यमंत्री देवेंद्र फडणवीस यांच्या विरोधात जोरदार घोषणा दिल्या.

Edited By : Siddharth Latkar