पंकजा मुंडेंच्या मुंबईतील कार्यालयाचं उद्घाटन लांबणीवर

बीड - लोकनेते गोपीनाथराव मुंडे यांचे वरळी (मुंबई) येथील कार्यालय पुन्हा सुरू करण्याची घोषणा पंकजा मुंडे यांनी केली होती. 26 जानेवारीला उद्‌घाटन होणार होते; परंतु आता उद्‌घाटन पाच फेब्रुवारीला होणार असल्याची माहिती माजी मंत्री पंकजा मुंडे यांनी दिली. 

12 डिसेंबरला परळीजवळील गोपीनाथगडावर लोकनेते गोपीनाथराव मुंडे यांच्या जयंती कार्यक्रमात पंकजा मुंडे यांनी भाजप सुकाणू समिती सोडत असून गोपीनाथ मुंडे प्रतिष्ठानच्या माध्यमातून काम करण्याचे जाहीर केले होते. त्यानुसार 26 जानेवारीला मुंबईतील कार्यालयाचे उद्‌घाटन करून 27 जानेवारीला औरंगाबादला उपोषण करण्याचेही त्यांनी जाहीर केले होते.

वरळीच्या शुभदा बिल्डिंगमधील कार्यालय 26 जानेवारीला पुन्हा सुरू करण्यात येणार होते; परंतु सरपंच, जिल्हा परिषदेचे सदस्य, लोकप्रतिनिधी व सर्व कार्यकर्त्यांच्या आग्रहाने ही तारीख पुढे ढकलल्याचे पंकजा मुंडे यांनी पत्रकात म्हटले आहे. आता हे उद्‌घाटन पाच फेब्रुवारीला सकाळी 11 वाजता होणार आहे. 

27 जानेवारीचे उपोषण होणार का? 
दरम्यान, जयंतीदिनीच पंकजा मुंडे यांनी 27 जानेवारीला औरंगाबादला उपोषण करणार असल्याचे जाहीर केले होते. उपोषणाच्या आदल्या दिवशी कार्यालयाचे उद्‌घाटन आणि लोकनेते गोपीनाथ मुंडे प्रतिष्ठानच्या माध्यमातून उपोषण केले जाणार होते. कार्यालयाचे उद्‌घाटन लांबल्यामुळे आता उपोषण 27 तारखेला होणार का, त्याची तारीखही पुढे ढकलणार? याकडे लक्ष लागले आहे.

Web Title inauguration worli office gapinath munde postpond