व्हीआईपी दर्शनाच्या नावाखाली साईभक्तांची लूट 

साईबाबांच्या दर्शनासाठी दररोज लाखो भाविक देशभरातून येत असतात, अनेकांना बाबांना जवळून पाहायची इच्छा असते, पण त्यासाठीची भली मोठी रांग धडकी भरवते. हीच गोष्ट हेरून एका टोळीनं साईभक्तांना लुटण्याचा प्लान आखला. व्हीआयपी दर्शन सोबत भक्त निवासात राहण्याची सोय करुन देतो सांगत प्रत्येक भक्ताकडून अडीच हजार घेतले जात होते. बरं एवढे पैसे घेऊन ना साईंचं व्हीआयपी दर्शन होत होतं, ना भक्त निवासात राहण्याची सोय. त्यामुळं भाबड्या भक्तांची लूट होत होती.

शिर्डी पोलिस साध्या वेषात फिरत असताना ही बाब लक्षात आली. आणि त्यांनी 12 जणांच्या मुसक्या आवळल्या. त्यांच्याविरुद्ध फसवणुकीचा गुन्हा दाखल करण्यात आलाय. भाबड्या भक्तांची लूट करणाऱ्या टोळीला अटक करण्यात आली असली तरी साईंच्या शिर्डीत अशा कितीतरी टोळ्या लुटण्यासाठी सावज हेरत असतात. त्यामुळं भक्तांनीच सावध राहून अशा कोणत्याही टोळीच्या भुलथापांना बळी न पडणं जास्त सोयीचं ठरेल. 

WebTitle : MARATHI NEWS MAHARASHTRA POLICE CAUGHT 12 PEOPLE FOR LOOTING DEVOTEES