Kalyan News: महावितरण कर्मचाऱ्यांच्या डोक्याला ताप; वीज चोरीचे तब्बल 105 प्रकरण

अभिजीत देशमुख

Titwala News: थकीत बिलापोटी वीज पुरवठा खंडित केल्यानंतर पुन्हा चोरून वीज जोडणी करून वीज वापरणाऱ्या टिटवाळा उपविभागातील 105 जणांविरुद्ध महावितरणकडुन मुरबाड पोलीस ठाण्यात वीज चोरीचे गुन्हे दाखल करण्यात आले आहेत.

महावितरणच्या कल्याण परिमंडळच्या पथकाने टिटवाळा परिसरात धडक कारवाई करून 54 लाख 56 हजार रुपयांची वीजचोरी उघडकीस आणलेल्या ग्राहकांचा यात समावेश आहे. या पार्श्वभूमीवर महावितरणच्या पथकाने टिटवाळा, मांडा, बल्याणी, अष्टविनायक चाळ, श्रीदेवी चाळ भागात थकबाकीमुळे कायमस्वरुपी वीजपुरवठा खंडित केलेल्या वीज ग्राहकांची तपासणी केली. (Latest Marathi News)

कल्याण (Kalyan) परिमंडळाचे मुख्य अभियंता धनंजय औंढेकर व कल्याण मंडळ दोनचे अधीक्षक अभियंता दिलीप भोळे यांच्या मार्गदर्शनाखाली ही मोहिम राबवण्यात आली. या तपासणीत 105 जणांकडून विजेचा चोरटा वापर सुरू असल्याचे आढळले. त्यानुसार संबंधिताना चोरीच्या विजेचे देयक व तडजोडीची रक्कम भरण्याबाबत नोटिस देण्यात आली.

परंतु विहित मुदतीत रकमेचा भरणा न झाल्याने संबंधितांविरुद्ध मुरबाड पोलीस (Police) ठाण्यात फिर्याद दाखल करण्यात आली. त्याप्रमाणे गुन्हा दाखल झाला असून पोलीस या गुन्ह्याचा तपास करत आहेत. (Kalyan News)

थकबाकीपोटी एकदा वीजपुरवठा खंडित केल्यानंतर थकीत वीजबिलाचा भरणा व पुनर्जोडणी शुल्क भरल्याशिवाय संबंधित ग्राहकांचा वीजपुरवठा पूर्ववत केला जात नाही. तर अशा ग्राहकांनी परस्पर वीजजोडणी, शेजारी किंवा इतरांकडून वीज घेतल्याचे आढळल्यास संबंधित ग्राहक व त्यांना वीज पुरविणारा अशा दोघांविरुद्धही फौजदारी अथवा दंडात्मक कारवाई करण्यात येत असल्याचे महावितरणने स्पष्ट केले.