Mumbai Bank : महाविकास आघाडीला मोठा धक्का; भाजपची खेळी ठरली यशस्वी

मुंबई: शिवसेनेतील (ShivSena) ४० आमदारांच्या बंडानंतर राज्यात सत्तांतर झाले. भाजप आणि शिंदे गट एकत्र येत सत्ता स्थापन केली. या सत्तांतरानंतर राज्यातील सत्तेची गणिते बदलण्यास सुरुवात झाली आहे. आता मुंबई बँकेतही महाविकास आघाडीला धक्का बसणार आहे. वरहूी भाजपची सत्ता येणार असल्याचे बोलले जात आहे.

मुंबई बँकेच्या उद्या पार पडणाऱ्या संचालक मंडळाच्या बैठकीत अध्यक्ष आणि उपाध्यक्ष निवडणूकीचा कार्यक्रम होणार आहे. या निवडीत भाजपचे (BJP) आमदार प्रविण दरेकर पुन्हा मुंबई बँकेचे अध्यक्ष होणार असल्याचे बोलले जात आहे.

भाजप आमदार प्रविण दरेकर (Pravin Darekar) पुन्हा बँकेचे अध्यक्ष होणार असल्याचे बोलले जात आहे. सिद्धार्थ कांबळे यांनी गेल्या आठवड्यात अध्यक्षपदाचा राजीनामा दिला आहे. तर विठ्ठल भोसले यांनी उपाध्यक्ष पदाचा राजीनामा दिला आहे. प्रवीण दरेकर यांचे अवघ्या सहा महिन्यांत मुंबई बँकेच्या अध्यक्ष पदावर पुनरागमन होणार आहे.

गेल्या एक महिन्यापासून राज्यात राजकीय नाट्य सुरू आहे. शिवसेनेचे ज्येष्ठ नेते एकनाथ शिंदे यांच्यासह ४० आमदारांनी बंड केले, त्यामुळे महाविकास आघाडी सरकार कोसळले. मुख्यमंत्रीपदाची एकनाथ शिंदे यांनी तर उपमुख्यमंत्रीपदाची देवेंद्र फडणवीस (Devendra Fadnavis) यांनी शपथ घेतली. त्यामुळे आता राज्यातील समीकरणे बदलण्यास सुरूवात झाली आहे.

दरम्यान, शिंदे-फडणवीस सरकारचा मंत्रिमंडळ विस्तार काही दिवसात होणार आहे. तर दुसरीकडे शिवसेनेने बंडखोर आमदारांच्या विरोधात सर्वाच्च न्यायालयात शिवसेनेने याचिका दाखल केली आहे.

एकनाथ शिंदे (Eknath Shinde) गट विरुद्ध शिवसेना वादावर आज सुप्रीम कोर्टात (Supreme Court) महत्वाची सुनावणी पार पडली. कोर्टाने दोन्ही गटाचं म्हणणं ऐकून घेतलं. त्यानंतर या प्रकरणाची सुनावणी पुढे ढकलण्यात आली. आता पुढील सुनावणी येत्या सोमवारी म्हणजेच ८ ऑगस्ट रोजी होणार आहे. दरम्यान, आजच्या सुनावणीत सुप्रीम कोर्टाने उद्धव ठाकरे यांना एक मोठा दिलासा दिला आहे.