राणा दाम्पत्याकडून न्यायालयाचा अवमान?; शिवसेना कोर्टात जाण्याच्या तयारीत

मुंबई: राणा दाम्पत्याला १२ दिवसांनी न्यायालयाने सशर्त जामीन मंजूर केल्यानंतर त्यांना माध्यमांशी बोलायला बंदी घातली होती. आता रवी राणा (Ravi Rana), नवनीत राणा (Navneet Rana) यांनी केलेल्या वक्तव्या नंतर शिवसेना न्यायालयात जाण्याच्या तयारीत आहे. दाखल गुन्ह्यात जामीन दिल्यानंतर कोर्टाचा अवमान राणा दाम्पत्यानी केला असल्याचा आरोप शिवसेनेने केला आहे. गुन्हा दाखल झालेल्या मुद्यावर न बोलण्याच्या अटीवर राणा दाम्पत्याना जामीन देण्यात आला होता. राणा दाम्पत्यानी हनुमान चाळीसा, मुख्यमंत्र्यांवरती आरोप करत कोर्टाचा अवमान केला असल्याचा दावा शिवसेनेने दिला आहे.

नवनीत राणा यांनी रुग्णालयातून बाहेर आल्यानंतर शिवसेना आणि उद्धव ठाकरे यांच्यावर जोरदार टीका केली. मुंबई महापालिकेत शिवसेने विरोधात प्रचार करणार असल्याचे नवनीत राणा म्हणाल्या. आता त्याला माजी महापौर किशोरी पेडणेकर यांनी उत्तर दिले आहे. नवनीत राणा विषय संपला होता. आता त्या काहीही बोलू लागल्या आहेत. त्यांनी शिवसेनेविषयी वक्तव्य केले, काय झाले माहीत आहे ना? राणा दाम्पत्यांनी मीडिया समोर बोलत कोर्टाचा अवमान केला आहे.

कोर्टात पुन्हा काय ते होईल असे पेडणेकर म्हणाल्या आहेत. नवनीत राणा यांनी मुंबईत महापालिका निवडणुकीत येऊनच दाखवावे. कोणाला आव्हान देताय तुम्ही? हॉस्पिटलमध्ये असतांना जे भेटायला गेले त्यातून त्या कोणासाठी काम करत होत्या हे जगाला कळले आहे. भाजपच्या प्रचारासाठी यायचे तर यावे असे किशोरी पेडणेकर म्हणाल्या आहेत.

Edited By: Pravin Dhamale