Badlapur: साधी लोकल रद्द करून एसी लोकल नकोच; प्रवाशांची रेल्वे प्रशासनाकडे मागणी

बदलापूर - गर्दीच्या वेळी साधी लोकल रद्द करून एसी लोकल (AC Local) सुरू करू नका, एसी लोकलसाठी स्वतंत्र वेळापत्रक तयार करा, अशी मागणी बदलापूरच्या (Badlapur) रेल्वे प्रवाशांनी केली आहे. काल बदलापूर रेल्वे स्थानकात एसी लोकलच्या विरोधात संतप्त प्रवाशांनी स्टेशन मास्तरांना घेराव घातला होता.

हे देखील पाहा -

बदलापूर शहराची लोकसंख्या झपाट्याने वाढत चालली असून त्या तुलनेत बदलापूर रेल्वे स्थानकातून सुटणाऱ्या लोकलची संख्या अतिशय कमी आहे. त्यात संध्याकाळी ऐन गर्दीच्या वेळी मुंबईहून येणारी ५.२२ ची सीएसएमटी बदलापूर लोकल रद्द करून त्याजागी एसी लोकल सुरू झाल्याने एसी लोकल रिकामी जाते आहे.

तर गर्दीचा सगळा भार मागून येणाऱ्या खोपोली लोकलवर पडत असून या लोकलमध्ये शिरायलाही जागा नसल्याचं प्रवाशांचं म्हणणं आहे. तसंच एसी लोकल सुरू करायला आमचा विरोध नसून साधी लोकल रद्द करून त्याजागी एसी लोकल सुरू करण्यास आमचा विरोध असल्याचं प्रवाशांनी स्पष्ट केलं. सोबतच बदलापूर रेल्वे स्थानकातून सुटणाऱ्या लोकलची संख्या वाढवण्याची मागणी देखील प्रवाशांकडून करण्यात येत आहे.

Edited by - Shivani Tichkule