Dombivali News : धूलिवंदनाच्या दिवशी क्षुल्लक वाद, टोळीकडून दोन तरुणांना बेदम मारहाण, डोक्यावर फोडल्या बियरच्या बाटल्या

>>अभिजीत देशमुख

Dombivali Crime News : राज्यात सर्वत्र धूलिवंदनाचा उत्साह असताना डोंबिवलीत एका टोळीने दोन तरुणांना बेदम मारहाण केल्याची घटना घडली आहटे. डोंबिवलीत सायंकाळी क्षुल्लक वादातून तरुणांच्या टोळीने दोन तरुणांना बेदम मारहाण करत डोक्यावर बियरच्या बाटल्या फोडल्या.

या प्राणघातक हल्ल्यात दोन्ही तरुण गंभीर जखमी झाले असून त्यांना उपचारासाठी रुग्णालयात दाखल करण्यात आले आहे. ओमकार माळी आणि अभिषेक भोईर अशी जखमी तरुणांची नावे आहेत. या प्रकरणी विष्णू नगर पोलिस अधिक तपास करत आहेत.

मिळालेल्या माहितीनुसार, ओमकार माळी आणि अभिषेक भोईर हे दोन्ही तरुण डोंबिवली पश्चिमेकडील मोठागाव परिसरात राहतात. सायंकाळच्या सुमारास हे दोघे सातपूल परिसरातून जात होते. त्यावेळी तेथे काही तरुण दारू पीत बसले होते. या तरुणांनी या दोघांना शिवीगाळ केली. (Latest Marathi News)

ओमकार आणि अभिषेकने त्यांना शिवीगाळ करू नका असे सांगताच तेथील तरुणांच्या टोळीने त्यांना लाथा बुक्क्याने बेदम मारण करण्यास सुरुवात केली. ते एवढ्यावरच थांबले नाहीत. त्यानंतर त्यांनी दोघांच्या डोक्यात बियरच्या बाटल्या फोडल्या.

या हल्ल्यात दोन्ही तरूण गंभीर जखमी झाले असून त्यांना उपचारासाठी रुग्णालयात दाखल करण्यात आले आहे. ही तरुणांची टोळी परिसरात दहशत पसरवत असते अशी माहिती आहे. दहशत पसरवण्याच्या उद्देशानेच त्यांनी हल्ला केल्याचे देखील बोलले जातेय. या घटनेची पोलिसांनी गांभीर्याने दखल घेतली असून या प्रकरणी तपास सुरु केला आहे. (Dombivali News)