Dombivali News: अ‍ॅम्बुलन्स रस्त्यातच बंद पडली; शिवसेनेच्या माजी आमदाराचं उपचाराअभावी निधन

अभिजीत देशमुख

कल्याण : शिवसेनेचे परळ लालबाग विधानसभा मतदार संघातील माजी आमदार सूर्यकांत देसाई यांचे शुक्रवारी डोंबिवलीत निधन झाले. माजी आमदार देसाई हे १९९५ ते २००० या कालावधीत परळ-लालबाग विधानसभा मतदारसंघात शिवसेनेचे आमदार होते. गेली 22 वर्ष देसाई हे डोंबिवली पश्चिमेकडील भागशाला मैदान येथील काशीकुंज सोसायटी जयेश स्मृती येथे राहत होते.

कालपासून त्यांना श्वास घेण्यास त्रास होत होता. देसाई यांच्यावर डोंबिवली पूर्वेकडील कारवा रुग्णालयात उपचार सुरू होते. त्रास वाढल्याने त्यांना व्हेंटिलेटरची गरज होती, मात्र व्हेंटिलेटर नसल्याने कारवा रुग्णलयाने देसाई यांना दुसऱ्या रुग्णालयात हलवण्यास कुटुंबियांना सांगितले.  (Latest Marathi News)

कुटुंबियांनी साई पूजा रुग्णवाहिका संस्थेला फोन करून रुग्णवाहिकेला पाचरण केले. मात्र देसाई यांना घेऊन जात असताना कारवा रुग्णालयासमोर रुग्णवाहिका बंद पडली. रुग्णवाहिका बंद पडल्याने देसाई यांना रुग्णवाहिकेतून ममता हॉस्पिटलमध्ये नेत असताना रुग्णवाहिका ढकल्याची वेळ कुटुंबियांवर आली होती.

शुक्रवारी सकाळी ११ वाजण्याच्या सुमारास डोंबिवली पूर्वेकडील कारवा हॉस्पिटलसमोर ही घटना घडली. कुटुंबियांना कारवा हॉस्पिटल ते मंजुनाथ शाळेपर्यंत रुग्णवाहिका ढकलावी लागली. नादुरुस्त रुग्णवाहिका बंद पडल्याने, उशिरा हॉस्पिटलमध्ये पोहोचल्याने देसाई यांचा मृत्यू झाल्याचा आरोप नातेवाईकांनी केला आहे. देसाई यांचा मुलगा ऋषिकेश याने साई पूजा रुग्णवाहिका विरोधात रामनगर पोलीस ठाण्यात तक्रार दाखल करणार असल्याचे सांगितले.