Eknath Shinde Live Updates: एकनाथ शिंदे गटाचे नरहरी झिरवळ यांना पत्र; गटनेतेपदी शिंदे तर मुख्य प्रतोदपदी गोगावले

शिवसेना घटकपक्षाची बैठक पार पाडून सदर बैठकीत पक्षाच्या गटनेतेपदी एकनाथ शिंदे यांची तर मुख्य प्रतोदपदी भरत गोगावले यांची निवड केल्याचे सर्वानुमते निश्चित करण्यात आले आहे. या पत्रावर शिवसेनेच्या ३७ आमदारांची स्वाक्षरी असून, या पत्राची प्रत विधानसभेचे उपाध्यक्ष नरहरी झिरवाळ राज्यपाल भगतसिंह कोश्यारी आणि विधानपरिषदेचे सचिव यांना पाठवण्यात आले आहे.

राज्यात शिवसेना (ShivSena) आमदारांच्या बंडानंतर महाविकास आघाडी सरकार अडचणीत आले आहे. एकनाथ शिंदे यांच्यासह ४२ आमदारांनी बंड केले आहे. शिवसेनेचे बंडखोर आमदार गुवाहाटीमधील एका हॉटेलमध्ये आहेत. आज पुन्हा चार आमदार गुवाहाटीत गेले आहेत. मंत्री दादा भुसे आणि आमदार रवींद्र फाटक, आमदार संजय राठोड, अपक्ष आमदार गीता जैन, किशोर जोडगेवार हे आता गुवाहाटील पोहोचले आहेत.

सूत्रांनी दिलेल्या माहितीनुसार, शिवसेना पक्षप्रमुख आणि राज्याचे मुख्यमंत्री उद्धव ठाकरे यांनी मुंबईत पक्षाच्या पुढील रणनीतीसाठी पदाधिकाऱ्यांसोबत बैठक घेतली. या बैठकीत शिवसेना पक्ष वाढवण्याबाबत मुख्यमंत्री ठाकरे यांनी सूचना दिल्या. मुख्यमंत्र्यांनी एकनाथ शिंदे गटाबाबत आणि सोडून गेलेल्या आमदारांविषयी बैठकीत कोणतीही चर्चा केली नाही. विभागावर लक्ष द्या आपण ताकदीने लढू, असं म्हणत ठाकरे यांनी शिवसैनिकांचा आत्मविश्वास वाढवला. तसेच विभागवार मेळावे लावाल शाखा शाखा पिंजून काढा.

या परिस्थितीवर मात करुन महाविकास आघाडीचे सरकार बहुमत सिद्ध करेल, असा विश्वास शरद पवार यांनी व्यक्त केला. अडीच वर्षे महाविकास आघाडीने चांगले काम केले. कोरोना काळात चांगले काम केले. प्रसिद्धी माध्यमातून काही गोष्टी समोर आल्या आहेत. ज्या पद्धतीने शिवसेनेच्या आमदारांना घेऊन गेले आहेत त्याची वस्तुस्थिती लोकांना सांगतिली आहे, आणि अजूनही त्यातील आमदार शिवसेनेसोबत आहोत हे स्पष्ट करतील, असं शरद पवार (Sharad Pawar) म्हणाले.

एकनाथ शिंदे यांच्या बंडामागे भाजपचा असा कुठला मोठा नेता आणि चेहरा काही करतोय हे अद्याप दिसून आलेले नाही, असे अजित पवार पत्रकार परिषदेत म्हणाले.

- एकनाथ शिंदे गट उद्या शुक्रवारी आमदारांच्या सह्यांचं पत्र राज्यपालांना पाठवणार असल्याची माहिती

- आमच्याकडे ४२ आमदारांचं संख्याबळ असल्याचं पत्र पाठवणार

- आणखी काही आमदार आज येणार असल्याने त्यांच्या सह्या घेऊन पत्र पाठवणार

रवींद्र फाटक गुवाहाटीला पोहोचल्याची माहिती, याआधी मिलिंद नार्वेकर यांच्यासोबत सूरत येथे शिंदेच्या भेटीसाठी फाटक गेले होते.

'चर्चेतून मार्ग निघू शकतो. चर्चा होऊ शकते. घरचे दरवाजे उघडे आहेत. का उगाच वण वण भटकताय? गुलामी पत्करण्यापेक्षा स्वाभिमानाने निर्णय घेऊ! जय महाराष्ट्र!' असं ट्विट संजय राऊत यांनी केलं आहे.

राष्ट्रवादी काँग्रेसच्या बैठकीला सुरुवात

शरद पवार, प्रफुल्ल पटेल, अजित पवार, जयंत पाटील, सुप्रिया सुळे, हसन मुश्रीफ, राजेश टोपे, सुनील तटकरे, दिलीप वळसे-पाटील यांच्यासह प्रमुख नेते आणि आमदार उपस्थित

महाराष्ट्रात जे काही सुरू आहे, त्यामागे भाजपचा हात - मल्लिकार्जुन खरगे

भाजपकडून महाविकास आघाडी सरकार अस्थिर करण्याचा प्रयत्न, खरगेंचा आरोप

ज्या राज्यांत काँग्रेसचे सरकार आणि बहुमत होते, तिथे अल्पमतात आणण्यासाठी भाजपने सर्व प्रयत्न केले. हाच खेळ महाराष्ट्रात सुरू आहे.

राष्ट्रपतीपदाच्या निवडणुकीमुळे भाजपचा महाविकास आघाडी सरकार पाडण्याचा प्रयत्न, खरगेंचा आरोप

- संजय राऊत यांच्या प्रस्तावावर विचार करण्याची वेळ निघून गेली

- ४० हून अधिक शिवसेनेचे आमदार आमच्यासोबत असल्याचा शिंदे यांचा दावा

- पुढच्या काही वेळात बैठक घेऊन यावर आमदारांशी बोलून निर्णय घेणार

- राऊत यांच्या प्रस्तावावर एकनाथ शिंदे थोड्याच वेळात व्हिडिओद्वारे प्रतिक्रिया देणार

शिवसेनेचे नेते एकनाथ शिंदे यांच्यासोबत शिवसेनेच्या ४२ आमदारांनी बंड केल्याचा दावा करण्यात आला, या संबंधित व्हिडिओ, आणि फोटो सोशल मीडियावर व्हायरल झाले आहेत. यापार्श्वभूमीवर शिवसेनेचे नेते संजय राऊत यांनी नवा दावा केला आहे. एकनाथ शिंदें यांच्या ताब्यात असलेल्या २१ आमदारांचा आमच्याशी संपर्क झालेला आहे, ते आमदार आमच्याशीच आहेत, असा दावा शिवसेना नेते संजय राऊत यांनी केला आहे. (Maharashtra Political Crisis)

एकनाथ शिंदे आणि त्यांच्यासोबत असलेल्या आमदारांनी गुवाहाटीमध्ये हॉटेलात जोरदार शक्तिप्रदर्शन केले. शिवसेनेचे ३७ आमदार आणि ९ अपक्ष आमदार एकनाथ शिंदे यांच्यासोबत गुवाहाटी येथील रेडिसन ब्लू हॉटेलमध्ये उपस्थित

राष्ट्रवादीच्या प्रमुख नेत्यांची बैठक आज पार पडली. त्यात कोणत्या मुद्द्यांवर चर्चा झाली हे प्रदेशाध्यक्ष जयंत पाटील यांनी सांगितले. आज झालेल्या बैठकीत सध्याचा घडामोडींवर चर्चा झाली. सरकार टिकावे यासाठी चर्चा झाली. गेलेले आमदार परत येतील, असा आम्हाला विश्वास आहे, असे पाटील म्हणाले. उद्धव ठाकरेंना आमचा पाठिंबा आहे. सरकार टिकविण्यास आम्ही सर्व प्रयत्न करणार आहोत, असंही त्यांनी सांगितलं. वर्षा बंगल्यावर राहण्यास ते पूर्वी तयार नव्हते. पण आमच्या आग्रहाने ते राहिले. त्यांनी 'वर्षा' सोडला म्हणजे मुख्यमंत्रिपद सोडलं असं नाही, असेही त्यांनी सांगितले. शिवसेनेतून आमदार बाहेर पडतील, असे कधी वाटत नव्हते. वेळ पडली तर विरोधात बसू, असं ते म्हणाले.

-वाशी येथील छत्रपती शिवाजी महाराज चौकात शिंदेंच्या समर्थनार्थ बॅनर

-सकल मराठा समाजाने लावला बॅनर

- शिवरायांचे तुम्ही खरे शिलेदार, शिंदेसाहेब आम्हाला तुमचा अभिमान आहे, अशा आशयाचे बॅनर

- शिवसेनेची अलिबागमध्ये होणारी बैठक रद्द

नरहरी झिरवाळ यांनी प्रसारमाध्यमांशी संवाद साधला. कायद्यानुसार, पक्षप्रमुख गटनेत्याची निवड करतो. मुख्यमंत्री महोदयांनी चौधरींच्या निवडीचे पत्र दिले. अजय चौधरींच्या निवडीला मान्यता दिली. सुनील प्रभू पक्ष प्रतोद आहेत. माझ्याकडे अन्य कोणतेही पत्र आलेले नाही. दावा करणे हा त्यांचा प्रश्न आहे. कायद्यानुसार जे योग्य आहे ते करू, असे झिरवाळ यांनी सांगितले.

मुंबई: सिल्व्हर ओकवरील बैठक संपली आहे. राष्ट्रवादी काँग्रेस उद्धव ठाकरेंसोबतच आहे, अशी ग्वाही प्रदेशाध्यक्ष जयंत पाटील यांनी प्रसारमाध्यमांशी बोलताना दिली.

मुंबईतील आमदार तरी जाणार नाहीत असे वाटले होते. आम्हालाही आश्चर्य वाटत आहे, असं मोठं विधान जयंत पाटील यांनी केलं आहे.

एकनाथ शिंदे यांच्या गटाला राज्यात ८ कॅबिनेट मंत्रिपदे, ५ राज्यमंत्रिपदे देण्याची शक्यता, तर केंद्रात २ मंत्रिपदे मिळण्याची शक्यता, सत्ता समिकरणाच्या हालचाली सुरू

उद्धव ठाकरे यांच्या मनात नेमकं चाललंय काय हे कळायला मार्ग नाही. सरकार अडचणीक असताना ते आज मंत्रालयातील सचिवांसोबत व्हीसीद्वीरे बैठक घेणार आहेत.

शिवसेना आमदार सदा सरवणकर, मंगेश कुडाळकर, दीपक केसरकर आणि रामटेकचे अपक्ष आमदार आशिष जैस्वाल गुवाहाटी येथील रेडीसन ब्लु हॉटेलमध्ये पोहोचल्यामुळे एकनाथ शिंदे (Eknath Shinde) यांची ताकद आणखी वाढली आहे.