Eknath Shinde-Amol Mitkari | जे चालवलंय ते बरे नाही शिंदे साहेब, फडणवीसांच्या नादाला...; आमदाराचं टीकास्त्र

Eknath Shinde Update News | मुंबई: मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांच्या सरकारला आता महिना पूर्ण झाला आहे. अद्याप मंत्रिमंडळाचा विस्तार झालेला नाही. राज्याच्या मंत्रिमंडळ विस्ताराचा मुहूर्त सापडला असून, उद्या भाजप आणि शिंदे गटातील आमदार हे मंत्रिपदाची शपथ घेण्याची शक्यता आहे. त्याचवेळी मंत्रिमंडळ विस्तारावरून राष्ट्रवादी काँग्रेसच्या आमदारानं शिंदे-फडणवीस सरकारवर हल्लाबोल केला आहे. तसंच एकनाथ शिंदे यांना सल्ला देऊ केला आहे.

जे चालवलंय ते बरे नाही शिंदे साहेब, फडणवीसांच्या नादाला लागून आपण राज्य अधोगतीकडे नेत आहात, असं या आमदारानं ट्विट केले आहे.

शिवसेनेत बंड करून एकनाथ शिंदे (Eknath Shinde) आणि त्यांचे समर्थक आमदार यांनी भाजपसोबत (BJP) राज्यात सरकार स्थापन केलं. एकनाथ शिंदे यांनी मुख्यमंत्रिपदाची शपथ घेतली. तर देवेंद्र फडणवीस (Devendra Fadnavis) यांनी उपमुख्यमंत्रिपदाची शपथ घेतली आहे.

एकनाथ शिंदे यांचे सरकार (Maharashtra Government) राज्यात येऊन आता महिना पूर्ण झाला आहे. मात्र, अद्याप मंत्रिमंडळ विस्तार झालेला नाही. राज्य सरकार स्थापन झाल्यापासून मंत्रिमंडळ बैठकाही झाल्या. त्यात अनेक निर्णय घेण्यात आले. मात्र, यावरून आता विरोधी पक्ष राष्ट्रवादी काँग्रेसच्या नेत्यांकडून टीका होत आहे. राष्ट्रवादी काँग्रेसचे आमदार अमोल मिटकरी यांनी शिंदे आणि फडणवीस यांच्यावर हल्लाबोल केला आहे.

शिंदे सरकारला ३५ दिवस पूर्ण झाले आहेत. राज्याच्या राजकीय इतिहासात पहिल्यांदा कॅबिनेटविना एकहाती सरकार. या खेळात मात्र सामान्य जनता होरपळत चालली आहे. जे चालवलं आहे, ते बरं नाही शिंदे साहेब. फडणवीसांच्या नादाला लागून आपण राज्य अधोगतीकडे नेत आहात, असं अमोल मिटकरी यांनी ट्विटमध्ये म्हटलं आहे.