Measles Disease In Mumbai: मुंबईत गोवर आजाराचा संसर्ग वाढला; मुख्यमंत्र्यांनी बोलावली तातडीची बैठक

Measles Disease In Mumbai: गेल्या काही दिवसांपासून मुंबईत गोवर या आजाराच्या संसर्गाचे प्रमाण वाढले आहे. याबाबत पालिकेडून उपाय योजनाही सुरू आहे. पण तरिही गोवर रुग्णांची संख्या वाढतच असल्याने यावर तोडगा काढण्यासाठी मुख्यमंत्री एकनाथ शिंदे यांनी आज, गुरूवारी आरोग्य विभागातील अधिकाऱ्यांची तातडीची बैठक बोलावली आहे. (Mumbai Latest News)

मिळालेल्या माहितीनुसार, या बैठकीला सार्वजनिक आरोग्य खात्याचे सचिव यांच्यासह आरोग्य विभागातील अन्य अधिकारी उपस्थित राहणार असल्याची माहिती सूत्रांनी दिली. राज्यमंत्री मंडळाची बैठक संपल्यानंतर ही महत्वपूर्ण बैठक मंत्रालयाच्या मंत्रिमंडळ सभागृहात होणार असल्याची माहिती सूत्रांनी दिली आहे. या बैठकीत गोवर या आजारावर प्रतिबंधक उपाययोजनांचा आढावा मुख्यमंत्री एकनाथ शिंदे (Eknath Shinde) घेऊन पुढील सूचना संबधित अधिकाऱ्यांना देणार असल्याचे कळते.

पालिकेने (BMC) दिलेल्या माहितीनुसार, गोवर आजाराने बाधीत सहा बालके ही ऑक्सिजनवर आहेत. सोमवारी १२ मुलांची या दोन्ही लक्षणांसाठी नोंद करण्यात आली. मुंबईत सध्या गोवर रोगाचे १६४ रुग्ण आहेत. ही गंभीर रुग्णवाढ आणि त्याची गंभीरता लक्षात घेता राज्य मंत्रिमंडळाच्या बैठकीतही गोवर आजारवर चर्चा केली जाणार आहे.

Edited By - Akshay Baisane