अभिजित देशमुख
कल्याण-डोंबिवलीत शिवसेना (शिंदे गट) आणि मनसे यांच्यात राजकीय 'शीतयुद्ध' सुरूच आहे. मनसेचे आमदार राजू पाटील यांनी यावेळी शिंदे गटाच्या खांद्यावरून भाजपवर थेट 'बाण' सोडला आहे.
भाजपने महापौर निवडून आणण्याच्या वल्गना करूच नये. कल्याण-डोंबिवलीत शिंदे गटासमोर भाजपचं काहीही चालत नाही, अशा शब्दांत पाटील यांनी भाजपला डिवचलं आहे.
कल्याणमधील रुग्णालयाच्या कारभारावरून मनसेचे आमदार राजू पाटील यांनी शिवसेनेचे खासदार श्रीकांत शिंदे यांच्यावर अप्रत्यक्ष टीकास्त्र सोडलं होतं. आता राजकीय मुद्द्यावरूनही पाटील यांनी शिवसेना (शिंदे गट) आणि भाजपवर तोफ डागली आहे.
कल्याण-डोंबिवलीत आगामी काळात भाजपचा महापौर असेल, असा दावा पक्षाच्या नेत्यांकडून करण्यात येत आहे. यावरून राजू पाटील यांनी भाजपची खिल्ली उडवली.
प्रत्येक राजकीय पक्षाचा नेता, पदाधिकारी आणि कार्यकर्त्याला वाटतं की आपल्या पक्षाचा महापौर असला पाहिजे. मनसेचाही महापौर असावा, अशी आमची इच्छा आहे, असे राजू पाटील म्हणाले.
कल्याण-डोंबिवली महापालिकापुरतं बोलायचं झालं तर, शिंदे गटासमोर भाजपचे काही चालत नाही. मात्र बहुमत आले तर, त्यांना महापौरपदाच्या शुभेच्छा, असा टोलाही पाटील यांनी यावेळी लगावला.
मुंबई-गोवा महामार्गाच्या दुरवस्थेवरूनही काही दिवसांपूर्वी राजू पाटील यांनी भाजपवर निशाणा साधला होता. मनसेने महामार्गावर कोकण जागर यात्रा काढली होती. महामार्गावरील खड्ड्यांवरून आक्रमक भूमिका घेत राज्य सरकारवर टीकेची झोड उठवली होती.
मनसेच्या या यात्रेनंतर भाजपच्या कल्याण ग्रामीण जागर यात्रेची पोस्ट सोशल मीडियावर व्हायरल झाली होती. त्यावर भाजपने जागर यात्रा काढावी, गाजर यात्रा काढू नका, असा टोला पाटील यांनी लगावला होता.
Read the latest Marathi news and watch Live Streaming on Saam TV. Breaking news from Maharashtra, India, Pune, Mumbai, Politics, Entertainment, Sports, Lifestyle, Jobs, and Education at Saam TV. Get Live Marathi news on Mobile. Download the Saam Tv Marathi news Channel app for Android and IOS.
साम आता सर्व सोशल मीडिया प्लॅटफॉर्मवर. ताज्या घडामोडींसाठी फेसबुक, ट्विटर, इन्स्टाग्राम, शेअर चॅट आणि टेलिग्रामवर आम्हाला फॉलो करा. तसेच, साम टीव्हीच्या यूट्यूब चॅनेलला आजच सबस्क्राइब करा.
