Thane: अल्पवयीन मुलीचा विनयभंग करणाऱ्या आरोपीला अटक; मुख्यमंत्र्यांनी स्वतः दिले होते आदेश

ठाणे: एका अल्पवयीन मुलीचा विनयभंग (Molestation) करुन तिच्याशी अश्लील चाळे करणाऱ्या दिनेश गड (३२, रा. मनोरमानगर, ठाणे ) याला मोठ्या कौशल्याने चितळसर (Thane) पोलिसांनी अटक केली आहेआहे. परिसरातील ३५ ते ४० सीसीटीव्ही फुटेजची पडताळणी केल्यानंतर त्याचा शोध घेण्यात यश आल्याचं पोलिसांनी सांगितलं आहे. (Thane Crime News)

हे देखील पाहा -

ठाण्यातील घोडबंदर रोड, लॉकीम कंपनीच्या समोरील स्कायवॉकवरुन आर मॉलच्या दिशेने ही १७ वर्षांची मुलगी ११ ऑगस्टला सकाळी ६.२५ ते ६.३० च्या सुमारास जात होती. त्याचवेळी आरोपीने तिच्या पाठीमागून येऊन जबरदस्तीने तिचा विनयभंग केला. या झटापटीत मोठ्या धाडसाने त्याला प्रतिकारासाठी अल्पवयीने मुलीने आरोपीच्या गालावर चावा घेऊन स्वत:ची सुटका करून घेतली.

तिने याप्रकरणी चितळसर पोलीस ठाण्यात विनयभंगासह बालकांचे लैंगिक अपराधापासून संरक्षण अधिनियमाखाली त्याच्याविरुद्ध गुन्हा दाखल केला. आरोपीचे वर्णन, नाव, पत्ताही नव्हता, त्यामुळे त्याचा शोध घेण्याचे मोठे आव्हान होते. त्यात सोशल मीडियातूनही हे प्रकरण मोठ्या प्रमाणात व्हायरल झाल्याने थेट मुख्यमंत्री एकनाथ शिंदे यांनीही हे प्रकरण गांभीर्याने घेत आरोपीला शोधण्याचे आदेश पोलिसांना दिले होते.

वरिष्ठ पोलीस निरीक्षक सुलभा पाटील यांच्या मार्गदर्शनाखाली पोलिसांनी सीसीटीव्ही फुटेजची तपासणी केली. पोलीस निरीक्षक आर. बी. भिलारे यांनी आरोपीच्या शोधासाठी एक पथक तयार केले. खबरे, तांत्रिक तपास आणि वेगवेगळ्या ठिकाणच्या सुमारे ३५ ते ४० सीसीटीव्ही फुटेजद्वारे तसेच आरोपीची शरीरयष्टी व त्याची चालण्याची लकब यावरुन दिनेश याला मनोरमानगर भागातून १५ ऑगस्टला मध्य रात्री १ च्या सुमारास अटक केली गेली आहे.

Edited By - Akshay Baisane