मुंबईतील १४०० कोटींच्या ड्रग्ज प्रकरणाचं अंबरनाथ कनेक्शन ? अंमली पदार्थविरोधी पथकाने टाकली धाड

मुंबई : शहरापासून जवळच असलेल्या पालघर जिल्ह्यातील नालासोपाऱ्यात ड्रग्ज तस्करीविरोधात आतापर्यंतची सर्वात मोठी कारवाई काल गुरुवारी करण्यात आली . मुंबई पोलिसांच्या (police) गुन्हे शाखेच्या अंमली पदार्थविरोधी विभागाने (Anti Narcotics Cell) नालासोपाऱ्यात धडक कारवाई केली. या कारवाईत ७०३ किलो एमडी ड्रग्ज जप्त करण्यात (mephedrone) आले. याची किंमत बाजारात १४०३ कोटी रुपये असल्याचे सांगितले जात आहे. या प्रकरणी पोलिसांनी ५ आरोपींना अटक केलीय. परंतु, आज पुन्हा एकदा अंमली पदार्थविरोधी विभागाने धडक कारवाई करत अंबरनाथ एमआयडीसीतील एका केमिकल कंपनीवर धाड टाकली.

आनंदनगर एमआयडीसीतील एका कंपनीत ही धाड टाकण्यात आली. विशेष म्हणजे मुंबईतून अटक करण्यात आलेल्या आरोपीलाही या कंपनीत आणण्यात आलं होतं. त्यामुळे मुंबईच्या ड्रग्ज प्रकरणाचं कनेक्शन (Ambarnath) अंबरनाथमध्ये असल्याची शक्यता वर्तवण्यात येत आहे.

मिळालेल्या माहितीनुसार, अंमली पदार्थविरोधी विभागाच्या १८ ते २० अधिकाऱ्यांनी अंबरनाथमध्ये केलेल्या कारवाई दरम्यान काही नमुने ताब्यात घेतल्याची माहिती सूत्रांनी दिली आहे. त्यामुळं या कंपनीत एमडी ड्रग्ज तयार केलं जात होतं का? किंवा एमडी ड्रग्ज तयार करण्यासाठी या कंपनीतून कच्चा माल पुरवला जात होता का? असे प्रश्न उपस्थित झाले आहेत. पालघर (Palghar) जिल्ह्यातील नालासोपाऱ्यात एका मॅन्युफॅक्चरिंग युनिटवर मुंबई पोलिसांच्या गुन्हे विभागाच्या अंमली पदार्थविरोधी पथकाने गुरुवारी छापे मारले.

तब्बल ७०३ किलो एमडी (Drugs) जप्त करण्यात आले. या जप्त केलेल्या अंमली पदार्थाची किंमत बाजारात १४०३ कोटी रुपये असल्याचे सांगण्यात येत आहे. एएनसीने या प्रकरणात ५ आरोपींना अटक केली आहे. यात एका महिलेचाही समावेश आहे. अटक केलेल्या आरोपींविरोधात एनडीपीएस कायद्यान्वये कारवाई करण्यात येत आहे. हे सर्व आरोपी मानखुर्द,घाटकोपर,गोवंडी,नालासोपारा येथील आहेत.

Edited By - Naresh Shende