PM Modi Mumbai Visit: मुंबईकरांसाठी सुचना! ड्रोनसुद्धा उडू शकत नाही, वाहतुकीतही बदल; PM मोदींच्या सुरक्षेसाठी मुंबईत अलर्ट

Mumbai: पंतप्रधान नरेंद्र मोदी आज मुंबई दौऱ्यावर येत आहेत. या दौऱ्यामध्ये पंतप्रधान नरेंद्र मोदींच्या हस्ते कोट्यवधी रुपयांच्या विकास कामांचे उद्घाटन तसेच लोकार्पण सोहळा पार पडणार आहे. शिंदे फडणवीस सरकार सत्तेत आल्यानंतर पंतप्रधानांचा हा पहिलाच मुंबई दौरा आहे.

पंतप्रधानांच्या या दौऱ्यासाठी मुंबईमध्ये चोख बंदोबस्त ठेवण्यात आला असून नरेंद्र मोदींच्या सुरक्षेसाठी विशेष खबरदारी घेण्यात आली आहे.

पंतप्रधान नरेंद्र मोदी 19 जानेवारीला मुंबई दौऱ्यावर येणार आहेत. त्यांच्या एकदिवसीय दौऱ्यामुळे आर्थिक राजधानी मुंबईतील अनेक भागात वाहतुकीवर परिणाम होऊ शकतो. यादरम्यान ते अनेक प्रकल्पांचे उद्घाटन आणि अनेक योजनांची पायाभरणी करणार आहेत.

पंतप्रधान मोदींच्या (Narendra Modi) या भेटीबाबत, मुंबई वाहतूक पोलिसांनी ट्विट केले की, "१९ जानेवारी रोजी दक्षिणेकडील रस्त्यावर सायंकाळी ४.१५ ते ५.३० या वेळेत, तर पश्चिम द्रुतगती महामार्गावर संध्याकाळी ५.३० ते ६.४५ या वेळेत वाहतूक मंद होऊ शकते. उत्तरेकडील वाहतूकीवर परिणाम होऊ शकतो."

ड्रोनसह विविध उड्डाणांवर बंदी..

पंतप्रधान मोदींच्या गुरुवारी होणाऱ्या दौऱ्याच्या पार्श्वभूमीवर मुंबईतील वांद्रे कुर्ला कॉम्प्लेक्स आणि आजूबाजूच्या पोलीस ठाण्यांच्या हद्दीत सर्व प्रकारच्या उड्डाणांवर बंदी घालण्यात आली आहे. यामध्ये ड्रोन, पॅराग्लायडर्स आणि रिमोटली ऑपरेटेड लाईट एअरक्राफ्टचा समावेश आहे. वृत्तानुसार, BKC, अंधेरी, मेघवाडी आणि जोगेश्वरी पोलिस ठाण्याच्या हद्दीत गुरुवारी दुपारी 12 ते मध्यरात्री 12 पर्यंत ही बंदी करण्यात आला आहे.