Mangaon News : बिल्डिंगचं टेरेस, पायऱ्या, पार्किंगमध्ये रक्ताचा सडा; भलत्याच प्रकारामागचं गूढ काय?

सचिन कदम

Mangaon News : रायगड जिल्ह्यातून धक्कादायक वृत्त हाती आलं आहे. रायगड जिल्ह्यातील माणगावमध्ये एका इमारतीच्या टेरेस, पायऱ्या आणि पार्कींगसह मुख्य रस्त्यावर रक्ताचा सडा पडला आहे. या घटनेने परिसरात एकच खळबळ उडाली आहे. इमारतीत नक्की काय घटना घडली, याबाबत उत्तर अनुत्तरीत आहे. या प्रकरणी पोलिसांनी पुढील तपास सुरू केला आहे. (Latest Marathi News)

मिळालेल्या माहितीनुसार, रायगड जिल्ह्यातील माणगावमध्ये एका इमारतीच्या टेरेस, पायऱ्या आणि पार्कींगसह मुख्य रस्त्यावर रक्ताचा सडा पडला आहे. या घटनेमुळे परिसरात एकच खळबळ उडाली असून नक्की काय घटना घडली याबाबत अद्याप स्पष्ट झालं नाही. एवढं रक्त कसं आणि कोणाच सांडलं याबाबत नागरीकांमध्ये उलट सुलट चर्चा सुरु आहेत.

माणगाव शहरातील उतेखोल वाडी भागातील महालक्ष्मी कॉम्पेक्सच्या ए आणि बी विंगच्या इमारत आणि परीसरात ही सर्व घटना घडली आहे. आज, बुधवारी सकाळी येथील रहिवाशांच्या रक्त सांडल्याची घटना निदर्शनास आल्यानंतर बघ्यांची एकच गर्दी झाली. या प्रकरणी माणगाव पोलीस घटनास्थळी दाखल झाले.

या प्रकरणी पोलीस सांडलेल्या रक्ताचे नमुने घेऊन पुढील तपास करीत आहेत. येथील नागरीक देखील त्यांच्या परीने परिसरात तपास करीत आहेत. मात्र, या प्रकरणी कोणतीही माहिती पुढे आलेली नाही. परिसरात सीसीटीव्ही नसल्याने कोणताही धागादोरा पोलिसांच्या हाती मिळत नसल्याने तपास कामात अडचण निर्माण झाली आहे.