Sharad Pawar News : राष्ट्रवादीच्या बैठकीत लोकसभा-विधानसभा निवडणुकांबाबत मोठा निर्णय, शरद पवार म्हणाले...

Sharad Pawar, NCP Meeting Today : आगामी लोकसभा आणि विधानसभा निवडणुकांचे वारे आतापासूनच वाहू लागले असून, त्या पार्श्वभूमीवर राष्ट्रवादी काँग्रेसने घेतलेल्या बैठकीत मोठा निर्णय घेण्यात आला. महाविकास आघाडीतच लोकसभा आणि विधानसभा निवडणूक लढवायची असा निर्णय यावेळी घेण्यात आला. (Latest Marathi News)

कर्नाटक विधानसभा निवडणुकीत काँग्रेसला मतदारांनी स्पष्ट कौल दिला. कर्नाटक विधानसभा निवडणूक निकालानंतर महाराष्ट्रातील राजकारणात मोठ्या हालचाली सुरू झाल्या आहेत.

महाराष्ट्रातील महाविकास आघाडीतील काँग्रेस, शिवसेना (उद्धव बाळासाहेब ठाकरे), राष्ट्रवादी काँग्रेस या तीन प्रमुख घटकपक्षांनी आगामी निवडणुका एकत्रित लढण्यावर चर्चा सुरू आहे. अशातच राष्ट्रवादी काँग्रेसच्या बैठकीत लोकसभा आणि विधानसभा निवडणुका एकत्रित लढवण्याचा निर्णय घेण्यात आला आहे.

राष्ट्रवादी काँग्रेसचे सर्वेसर्वा शरद पवार यांच्या अध्यक्षतेखाली आज, बुधवारी मुंबईतील यशवंतराव चव्हाण प्रतिष्ठानमध्ये पक्षाची महत्वाची बैठक झाली. या बैठकीत विविध विषयांवर चर्चा झाली. त्यात आगामी लोकसभा आणि विधानसभा निवडणुकांचा मुद्दा केंद्रस्थानी राहिला. दरम्यान ज्या मतदारसंघात राष्ट्रवादी क्रमांक दोनवर आहे, त्याची जबाबदारी विभागवार नेत्यांना दिल्याचे सांगण्यात येत आहे.

महाविकास आघाडी भक्कम ठेवा- पवार

शरद पवार यांनी राष्ट्रवादी काँग्रेसच्या बैठकीत उपस्थितांना मार्गदर्शन केले. महाविकास आघाडी भक्कम ठेवा, लोकसभा आणि विधानसभा एकत्रितच लढवायच्या आहेत, असे त्यांनी यावेळी स्पष्ट केले.

राष्ट्रवादी पक्ष संघटनेत भाकरी फिरवणार

जे तीन वर्षांपेक्षा जास्त जिल्हाध्यक्ष, तालुकाध्यक्षपदावर आहेत, त्यांना बदलण्यात येणार

विभागवार शिबिरे घेण्यात येणार, तिथे राज्यातील प्रश्नांवरच चर्चा होणार

राष्ट्रवादीची १० जून रोजी मोठी सभा होणार