Shivsena: पुनश्च "उठा" या आशयाचे शिवसेनेचे बॅनर सोशल मीडियावर व्हायरल

प्रदीप भनगे

डोंबिवली : शिवसेनेचे (ShivSena) ज्येष्ठ नते एकनाथ शिंदे यांच्या बंडखोरीनंतर शिवसेनेत मोठे बदल केले असल्याचे दिसत आहे. ठाणे-कल्याणमध्ये मुख्यमंत्री एकनाथ शिंदे आणि शिवसेनेचे माजी आमदार सुभाष भोईर यांचे एकमेकांचे पटत नव्हते, त्यामुळे भोईर गेल्या काही वर्षापासून शांततेच्या भूमिकेत होते. पण आता शिंदे यांच्या बंडखेरीनंतर भोईर शिवसेनेत पुन्हा सक्रीय झाल्याचे दिसत आहेत.

शिवसेनेचे (ShivSena) माजी आमदार सुभाष भोईर हे आता पुन्हा चर्चेत आले आहेत. पक्ष प्रमुख उद्धव ठाकरे यांच्या आदेशानुसार कल्याण लोकसभा मतदारसंघाच्या संपर्क प्रमुखपदी माजी आमदार सुभाष भोईर यांची नियुक्ती झाल्यानंतर त्यांनी कल्याण लोकसभा मतदार संघ पिंजून काढला तर शिवसैनिकांना आधार दिला. ठाणे जिल्ह्यात आता शिवसेनेचे नेते म्हणून सुभाष भोईर यांच्याकडे पाहू लागले आहेत. त्यातच आता भोईर यांचा पुनश्च "उठा" असा संदेश असलेला बॅनर सोशल मीडियावर चांगलाच व्हायरल व्हायला लागला आहे. विशेष म्हणजे बॅनरवर लोकनेते स्व.दी.बा. पाटील यांचासुद्धा फोटो आहे. त्यामुळे भूमिपुत्रामध्ये याची चर्चा होऊ लागली आहे.

काय आहे बॅनरवर...

बॅनरवर शिवसेना (ShivSena) पक्ष प्रमुख उद्धव ठाकरे यांना शुभेच्छा देण्यात आल्या असून, पुनश्च "उठा" आपण बाळासाहेबांची सावली हिंदुहृदयसम्राटांच रक्त... सर्वसामन्यांच्या प्रेमाचे आसक्त तरीही योग्यासमान विरक्त... धीरगंभीर अन् कणखर न होई विचलित क्षणभर इतकी पातळ नाही शिवसेना तमाम हिंदू मने मनापासून आपल्याच पाठीशी आहे.

संपर्क प्रमुखपदी माजी आमदार सुभाष भोईर यांची नियुक्ती

ठाणे जिल्ह्याची धुरा ही भोईर यांच्या खांद्यावर जाण्याची शक्यता वर्तविली जात होती. मात्र आता उद्धव ठाकरे यांच्या आदेशानुसार कल्याण लोकसभा मतदारसंघाच्या संपर्क प्रमुखपदी माजी आमदार सुभाष भोईर यांची नियुक्ती करण्यात आली आहे, असे शिवसेना मध्यवर्ती कार्यालयातून प्रसिद्धीस दिलेल्या पत्रकाद्वारे कळविण्यात आले आहे.

एकनाथ शिंदे आणि सुभाष भोईर यांचे फारसे पटत नाही

एकनाथ शिंदे आणि सुभाष भोईर यांचे फारसे पटत नसल्याने भोईर गेल्या काही वर्षांपासून शांततेच्या भूमिकेत होते. ते पक्ष सोडतील अशी देखील चर्चा होती. मात्र राजकीय वारे बदलताच भोईर जिल्ह्यात सक्रिय झाल्याचे दिसत आहे. "मी आहे तिथेच आहे आणि उद्धव ठाकरेंच्या (Uddhav Thackeray) सोबतच आहे" असे स्पष्ट करत शिवसेनेचे (ShivSena) कल्याण ग्रामीणचे माजी आमदार, शिवसेनेचे ज्येष्ठ नेते सुभाष भोईर यांनी आपले समर्थन उद्धव ठाकरे यांना जाहीर केले आहे.