Ganeshostav 2023 : मुंबईत 10 दिवस रात्रभर बिनधास्त फिरा, गणेशोत्सवात रात्री विशेष बसेसची सोय

Mumbai News :

गणेशोत्सावाला अवघा एक दिवस उरला आहे. मुंबईसह राज्यात गणेशोत्सव सर्वात मोठ्या सणांपैकी एक आहे. गणेशोत्सवात 10 दिवस मोठ्या जल्लोषात साजरा केला जातो. राज्याच्या आणि देशाच्या कानाकोपऱ्यांतून गणेशभक्त मुंबईत दाखल होतात. गणेशोत्सवात मुंबईत रात्रीही मोठी गर्दी पाहायला मिळते.

मुंबईतील अनेक मंडळाचे गणपती, विद्युद रोषणाई, डेकोरेशन पाहण्यासाठी नागरिक रात्रीचे मुंबईत फिरतात. अशा गणेशभक्तांची गैरसोय होऊ नये म्हणून बेस्टने या दहा दिवस विशेष बसेसची सोय केली आहे.

मंगळवारपासून सुरु होणाऱ्या गणेशोत्सवासाठी बेस्टतर्फे 19 ते 27 सप्टेंबर या कालावधीत रात्री 11 ते सकाळी 6 या वेळेत 27 बसेस सोडण्यात येणार आहेत. टाईम्स ऑफ इंडियाने याबाबतचं वृत्त दिलं आहे. (Latest Marathi News)

सीएसएमटी ते सायन, वरळी ते काळाचौकी, नागपाडा ते ओशिवरा, शिवडी ते दिंडोशी, पायधुनी ते विक्रोळी, नागपाडा ते शिवाजी नगर, म्युझियम ते देवनार, गिरगाव ते सँडहर्स्ट रोड स्टेशन आणि म्युझियम ते शिवडी या विशेष बसेस सोडण्यात येणार आहेत.

गणसेवकांची नियुक्ती

गणेशोत्सवादरम्यान पोलिसांवरही ताण असतो. मात्र यंदा पोलिसांवरील ताण कमी करण्यासाठी मुंबईतील प्रत्येक गणेश मंडळांमध्ये गणसेवक नियुक्त केले जाणार आहेत. मुंबई पोलीस आयुक्त विवेक फणसाळकर यांनी बृहन्मुंबई सार्वजनिक गणेशोत्सव समन्वय समितीसोबत झालेल्या या बैठकीत हा निर्णय घेतला आहे.