ठाकरे गट आक्रमक; हिवाळी अधिवेशनात शिंदे-फडणवीस सरकारला घेरणार, कशी असेल रणनीती?

मुंबई : शिवसेनेत (Shivsena) फूट पडल्यानंतर आणि राज्यातील सत्तांतरानंतर दुसरं अधिवेशन येत्या काही दिवसात पार पडणार आहे. या अधिवेशनात सरकारला घेरण्यासाठी विरोधकांनी कंबर कसली आहे. शिंदे गट आणि भाजप सरकारला घेरण्यासाठी काय रणनिती असावी, यासाठी विरोधकांनी तयारी सुरु केली आहे.

हिवाळी अधिवेशनाच्या पार्श्वभूमीवर ठाकरे गटाच्या आमदारांची विधानभवनातील शिवसेना पक्ष कार्यालयात बैठक पार पडणार आहे. आगामी अधिवेशनात सरकारला घेरण्यासाठी ठाकरे गटाने रणनिती आखली आहे. (Tajya Batmya)

काही वेळापूर्वी मातोश्री येथे पक्षप्रमुख उद्धव ठाकरे यांनी विरोधी पक्षनेते अंबादास दानवे आणि गटनेते अजय चौधरी यांच्याशी चर्चा केली. यानंतर विधानभवनात बैठकीचं आयोजन करण्यात आलं आहे. आज 4 वाजता ही बैठक पार पडणार आहे.

हिवाळी अधिवेशनला अजून वेळ आहे. त्यामुळे त्यात काय काय असावे ते आताच सांगता येणार नाही. पण अधिवेशन हे मोठे असावे अशी आमची मागणी आहे. तसेच शेतकऱ्यांचे विषय, लम्पी आजार अशा अनेक विषयांवर सरकारला आम्ही अधिवेशनमध्ये जाब विचारू, असं विधानपरिषद विरोधी पक्षनेते अंबादास दानवे यांनी म्हटलं.