Jitendra Awhad : ठाण्यातील वाहतूक कोंडीवरून पालिकेवर संतापले जितेंद्र आव्हाड, ट्वीट करत केला राग व्यक्त

Jitendra Awhad on Thane Municipal Corporation : ''कोणत्याही प्रकारचे नियोजन न करता एकाचवेळेस शहरातील अनेक रस्त्यांची कामे सुरू करण्यात आलेली आहेत. त्याचा फटका सबंध ठाणे शहराला बसला असून वाहतूक कोंडीची तीव्रता अधिकाधिक वाढू लागली आहे,'' असं राष्ट्रवादीचे नेते जितेंद्र आव्हाड म्हणाले आहेत.

ते ट्वीट करत असं म्हणाले आहेत. आपल्या ट्विटमधून त्यांनी ठाणे पालिकेला लक्ष्य केलं आहे.

ट्वीट करत ते म्हणाले आहेत की, संपूर्ण ठाण्यात रस्त्यांची कामे चालू आहेत. जागोजागी खड्डे पाडून ठेवले आहेत. रस्ते खोदून ठेवले आहेत. याचे काही नियोजन केले आहे, असे काही दिसून येतं नाही. हजारो कोटींचे रस्ते होतं आहेत ही चांगली गोष्ट आहे. पण, या रस्त्यांची कामे पावसाळ्यापूर्वी होणार नाहीत.''  (Latest Marathi News)

आव्हाड म्हणाले, ''1 जून ते 1 ऑक्टोबर कामे करता येत नाहीत. तसा शासकीय नियम आहे. ही कामे जरी केली तरी त्याचा दर्जा कसा असेल, असा प्रश्न उपस्थित करून, हे हजारो कोटी जे ठाण्याच्या विकासासाठी आणले आहेत, ते पाण्यात वाहून गेले हे मनाला न पटणार आहे.''

जितेंद्र आव्हाड पुढे म्हणाले की, ''ठाणेकरांना वाहतूक कोंडीचा जो त्रास होतं आहे, तासन तास एका जागी जे उभे रहावे लागते. याला जबाबदार कोण? विशेष म्हणजे, वाहतूक विभागाला कोणतीही पूर्वासूचना न देता, त्यांच्याकडून ना हरकत दाखला न घेता त्यांना अंधारात ठेवून कामे सुरु केली आहेत. त्यामुळे पोलिसांना दोष देण्यात काहीच अर्थ नाही.''

ते म्हणाले की, ठाणे महानगरपालिकेने हे सगळं तपासायला हवं होतं. महानगरपालिका डोळ्यावर पट्टी बांधून काम करीत आहे. त्यामुळे त्यांनी ते काही तपासले असेल असे मला वाटत नाही. या वाहतूक कोंडीसाठी कोणी जबाबदार व्यक्ती आहे का? असा प्रश्न त्यांनी उपस्थित केला आहे.