चेंबूर: विजेची थकीत रक्कम न भरल्याने पुन्हा एकदा अदानी वीज कंपनीकडून चेंबूरच्या सिद्धार्थ कॉलोनीमधील साडेतीन हजार घरांचा वीजपुरवठा सोमवारपासून सकाळी ८ ते संध्याकाळी ५ वाजेपर्यंत बंद (Power Cut) करण्यात येत आहे. परिणामी स्थानिकांना मोठ्या अडचणींचा सामना करावा लागत असून याबाबत तीव्र आंदोलन (Agitation) करत मागणी पूर्ण झाली नाही तर मुख्यमंत्री यांच्या निवास्थानी मोर्चा घेऊन जाणार असल्याचा इशारा रहिवाशांनी दिलाय. (Three and a half thousand houses in Siddharth Colony of Chembur are power cut...)
हे देखील पहा -
चेंबूरमधील (Chembur) पूर्व द्रुतगती मार्ग आणि शीव-पनवेल महामार्गाच्या मध्यभागी ही सिद्धार्थ कॉलोनी (Siddharth Colony) वसली असून यामध्ये साडेतीन हजार घरे आहेत. २००५ मध्ये एका विकासकाने याठिकाणी एसआरए अंतर्गत इमारती उभ्या करून झोपडीतून सर्वांना इमारतीमध्ये घरे देण्याचे आमिष दाखवले. त्याचवेळी सर्व रहिवाशांचे वीजबील देखील भरणार असल्याचे आश्वासन विकासकाने दिले होते. त्यामुळे २००५ पासून येथील साडेतीन हजार कुटुंबीयांनी वीज बील भरलेच नव्हते. कोटींच्या घरात हे वीजबील पोहचल्यानंतर २०१७ आणि २०१९ ला या सर्व रहिवाशांची वीज बंद करण्यात आली होती. मात्र काही राजकीय नेत्यांच्या मध्यस्थीनंतर वीजपुरवठा सुरळीत करण्यात आला.
त्यानंतर यातील काही घरे सोडल्यास गेल्या तीन वर्षांपासून अनेक नागरिक नियमित वीज देयक भरत आहेत. मात्र सध्या ही थकबाकी ९९ कोटींच्या घरात पोहचली आहे. त्यामुळे अदानी कंपनीने सोमवारपासून पुन्हा येथील वीज पुरवठा खंडीत केला आहे. तसेच विकासक आणि अदानी यांनी मिळून आमची फसवणूक केल्याचं आरोप स्थानिकांनी केला आहे.
Edited By - Akshay Baisane
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.
