Saamana Editorial on BJP: हिंसाचार पेटवून राजकीय भाकऱ्या शेकायच्या...; ठाकरे गटाचा भाजपवर हल्लाबोल

Mumbai News: राज्यातील अनेक भागात हिंसाचाराच्या घटना घडल्या आहेत. राज्यातील हिंसाचाराच्या या घटनांमुळे विरोधी पक्षातील नेत्यांनी सत्ताधाऱ्यांना धारेवर धरलं आहे. या घटनांमुळे राज्यातील कायदा व सुव्यवस्थेवर प्रश्न उपस्थित केले जात आहे. अशातच ठाकरे गटाच्या दैनिक 'सामना'तील अग्रलेखातून भाजपवर निशाणा साधण्यात आला आहे. (Latest Marathi News)

ठाकरे गटाने राज्यातील वाढत्या हिंसाचारावरून भाजप आणि गृहमंत्री देवेंद्र फडणवीसांवर टीकास्त्र सोडलं आहे. 'हिंसाचार पेटवून राजकीय भाकऱ्या शेकायच्या हा भाजपचा पिढीजात धंदा आहे. निवडणुका जवळ आल्या की या धंद्यातील गुंतवणुकीत वाढ केली जाते. असे गुंतवणूकदार आता आपल्या राज्यात घुसले आहेत. म्हणूनच आम्हाला महाराष्ट्राच्या भवितव्याची चिंता वाटते', असा हल्लाबोल ठाकरे गटाने केला.

'राज्यात सध्या भडकविल्या जात असलेले हिंसाचार राजकीय हेतूने प्रेरित आहेत. त्या जाणीवपूर्वक घडवल्या जात आहेत. काही लोक आगीत तेल वगैरे ओतण्याचे काम करीत आहेत. त्यांचे चेहरे मी लवकरच बाहेर आणेन, असा इशारा गृहमंत्री फडणवीस यांनी दिला. पण त्यांचे बोलणे सध्या फोल ठरत आहे, अशी टीका ठाकरे गटाने फडणवीसांवर केली.

'बिहारातही हिंसाचार भडकविल्या गेले, पण फायदा झाला नाही. मणिपुरात भारतीय जनता पक्षाचे राज्य आहे. तेथे अख्खे राज्य हिंसाचारात होरपळले व त्या धुराचे लोट दिल्लीपर्यंत पोहोचले. तो वणवादेखील मोदी-शहांना अद्याप विझविता आलेला नाही, अशी टीका देखील ठाकरे गटाने केली.

'काही विषय सामंजस्याने, सलोख्याने सोडवले जाऊ शकतात; पण शिवसेना फोडून राज्य केले जात आहे, त्याप्रमाणे समाज फोडून त्यांना निवडणुका लढवायच्या असाव्यात. भारतीय संविधान, राष्ट्रीय एकात्मता, धार्मिक सलोखा यांची ऐशी की तैशी करून सत्ता भोगणारे गारदी सभोवती वावरत आहेत. राज्यातील जनतेने महाराष्ट्र हितासाठी सावध राहावे, असेही टीका ठाकरे गटाने केली.