विधानपरिषदेची निवडणूक होणारच; शेवटच्या क्षणी भाजपकडून 'ही' खेळी

मुंबई : राज्यसभेच्या निवडणुकीबरोबर विधानपरिषदेची निवडणूकही (MLC Election) चुरशीची होणार आहे. राज्यसभेत 6 व्या जागेसाठी भाजप विरोधात शिवसेना अशी रंगत पाहायला मिळाली.मात्र आता विधानपरिषदेच्या 10 जागांसाठी होणाऱ्या निवडणुकीत भाजप (BJP) विरोधात काँग्रेस (Congress) अशी लढत पाहायला मिळणार आहे. त्यामुळे २० जून रोजी भाजप विरुद्ध काँग्रेस अशी लढत पाहायला मिळणार आहे. (MLC Election 2022 Latest News In Marathi)

विधानपरिषदेच्या दहा जागांसाठी महाविकास आघाडीकडून ६ उमेदवार रिंगणात आहेत . तर भाजपकडून ५ उमेदवार रिंगणात आहे. या निवडणुकीत भारतीय जनता पक्षाकडून प्रवीण दरेकर, राम शिंदे, श्रीकांत भारतीय, उमा खापरे आणि प्रसाद लाड हे उमेदवार रिंगणात असणार आहेत. या निवडणुकीत भाजपच्या पाठिंब्यावर उभे असेलेले सदाभाऊ खोत यांनी विधानपरिषदेसाठीचा अर्ज मागे घेतला आहे. तर कांग्रेसकडून उमेदवार म्हणून चंद्रकांत हंडोरे आणि भाई जगताप रिंगणात आहेत. राष्ट्रवादीकडून रामराजे निंबाळकर आणि एकनाथ खडसे यांना उमेदवारी जाहीर करण्यात आली आहे. राष्ट्रवादीकडून एकनाथ खडसे यांचे राजकीय पुनर्वसन करण्यात आलं आहे.

विधानपरिषदेच्या निवडणुकीसाठी शिवसेनेकडून आमश्या पाडवी आणि सचिन अहिर यांना संधी दिली आहे. विधानपरिषदेच्या निवडणुकीत एमआयएमचे २ आमदार मतदान कोणाला करणार याकडे साऱ्यांकेड लक्ष असेल. राज्यसभेच्या निवडणुकीत फोडाफोडीचे राजकारण करत भाजपने सहावी जागा जिंकली. त्यानंतर विधानपरिषदेत १० व्या जागेसाठी भाजप किती मतं फोडाफोड करणार हे पाहवे लागणार आहे. प्रत्येक उमेदवाराला जिंकण्यासाठी २७ मतांचा कोटा आहे.तसेच विधानपरिषदेचे मतदान हे गुप्त मतदान असणार आहे.

सत्ताधारी महाविकास आघाडी संख्याबळ

शिवसेना - ५५

राष्ट्रवादी - ५३

काँग्रेस - ४४

बहुजन विकास आघाडी - ३

समाजवादी पार्टी - २

प्रहार जनशक्ती पार्टी - २

माकप - १

शेकाप - १

स्वाभिमानी पक्ष - १

क्रांतिकारी शेतकरी पार्टी - १

अपक्ष - ८

सत्ताधारीकडे एकूण संख्याबळ- १७१

......................

विरोधी पक्ष भाजपकडील संख्याबळ

भाजप - १०६

जनसुराज्य शक्ती - १

राष्ट्रीय समाज पक्ष - १

मनसे १

अपक्ष - ५

विरोधाकडे असलेले एकूण संख्याबळ - ११४