Sudan Clash : सुदानमध्ये लष्कर-निमलष्करी दलाचे जवान भिडले; तुफान गोळीबार, स्फोट आणि हल्ले...

Army Clashes with Paramilitary Forces In Sudan : सुदानमध्ये निमलष्करी दलाचे जवान आणि लष्कराचे जवान आपापसांत भिडले. सुरक्षा दलांमध्येच टोकाचा संघर्ष पेटल्यानं तेथील भारतीय नागरिकांसाठी दूतावासाकडून अॅडव्हायझरी जाहीर केली आहे.

सुदानमधील भारतीयांनी आपल्या घराबाहेर पडू नये. त्यांनी घरातच थांबावे अशा सूचना भारतीय मिशनकडून देण्यात आल्या आहेत. सुदानमधील या दोन्ही दलांचे सैनिक एकमेकांच्या ठिकाणांवर हल्ले करत आहेत.  (Latest News)

सूदानची राजधानी खार्तूमस्थित भारतीय (Indians) दूतावासानं ट्विट केलं आहे. गोळीबार आणि संघर्ष सुरू असल्याच्या पार्श्वभूमीवर सर्व भारतीयांनी सतर्कता बाळगावी. त्यांनी घरातच थांबावं. त्यांनी घराबाहेर पडू नये अशा सूचना दिल्या जात आहेत आणि त्याची तात्काळ अंमलबजावणी व्हावी, असे त्यात नमूद केले आहे. (Army)

तर काही प्रत्यक्षदर्शींनी घटनेबद्दल माहिती दिली. दक्षिण खार्तूममध्ये रॅपिड सपोर्ट फोर्स तळाजवळ दोन्ही दलांच्या सैनिकांमध्ये झटापटी आणि त्याठिकाणी स्फोटांचे आवाज ऐकल्याचे सांगितले जात आहे.

नेमका कशामुळे संघर्ष पेटला?

सूदानमधील सैन्यदलात निमलष्करी रॅपिड सपोर्ट फोर्स (RSF) चे नियोजित विलीनीकरणावरून लष्करी नेता अब्देल फतेह अल बुरहान आणि निमलष्करी दलाचे कमांडर मोहम्मद हमदान डागलो यांच्यात काही आठवड्यांपासून तणाव वाढत चालला होता. त्यानंतर शनिवारी या ठिकाणी हिंसाचार झाला. प्रत्यक्षदर्शींनी दक्षिण खार्तूममधील आरएसएफच्या तळाजवळ सैनिकांमध्ये संघर्ष झाल्याचे सांगितले. तुफान गोळीबार आणि जोरदार स्फोटांचे आवाज ऐकल्याचेही त्यांनी सांगितले.

प्रत्यक्षदर्शींच्या माहितीनुसार, विमानतळाजवळील परिसरात सैन्यांनी भरलेले ट्रक जाताना दिसून आले. तर आरएसएफच्या दाव्यानुसार, त्यांनी खार्तूम विमानतळावर पूर्णपणे नियंत्रण मिळवले आहे. एएफपी वृत्तसंस्थेनुसार, तोफांच्या माध्यमातून रस्त्यावर दगडफेक केली गेली आणि त्यानंतर नागरिकांनी स्वतःचा जीव वाचवण्यासाठी धावाधाव सुरू केल्याचे प्रत्यक्षदर्शींनी सांगितले.