Lalu Prasad Yadav : सीबीआयने लालू यादव यांना पाठवले समन्स, उद्या होणार चौकशी

Lalu Prasad Yadav News : नोकरीच्या बदल्यात जमीन घोटाळा प्रकरणी सीबीआयने लालू यादव यांना सीबीआयने समन्स बजावले आहे. नोकरीच्या बदल्यात जमीन घोटाळ्यात कथित सहभागाबाबत सीबीआय उद्या दिल्लीत लालू यादव यांची चौकशी करणार आहे.

सोमवारी सकाळी सीबीआयच्या पथकाने लालू यादव यांच्या पत्नी आणि बिहारच्या माजी मुख्यमंत्री राबडी देवी यांची चौकशी केली. सीबीआयने राबडी देवी यांची तब्बल 4 तास चौकशी केली.

मिळालेल्या माहितीनुसार, जमिनीच्या बदल्यात रेल्वेत नोकरी देण्याच्या प्रकरणी सीबीआयने राबडी देवी यांची चौकशी केली.

सीबीआय चौकशी संपल्यानंतर राबडी देवी विधान परिषदेत जात असताना त्यांना प्रश्न विचारण्यात आला. यावर राबडी देवी संतापल्या, त्या म्हणाल्या सीबीआय (CBI) आली तर काय करणार? सीबीआय नेहमीच आमच्या ठिकाणी येत असते.

न्यायालयाने यापूर्वीच लालू, राबरी यांच्यासह १४ जणांना समन्स पाठवले होते. विशेष म्हणजे या घोटाळ्याप्रकरणी न्यायालयाने लालू यादव (Lalu Yadav) राबडी देवी, मिसा भारती यांच्यासह १४ आरोपींना समन्स बजावले असून त्यांना १५ मार्च रोजी न्यायालयात हजर राहण्यास सांगितले आहे. लालू नुकतेच किडनी प्रत्यारोपण करून सिंगापूरहून मायदेशी परतले असताना त्यांना हे समन्स बजावण्यात आले आहे.

नेमकं प्रकरण काय?

वास्तविक नोकरी घोटाळ्याचे हे प्रकरण १४ वर्षे जुने आहे. हा घोटाळा लालू यादव रेल्वेमंत्री असतानाचा आहे. लालू यादव रेल्वेमंत्री असताना लोकांना रेल्वेत नोकऱ्या देण्याऐवजी जमिनी लिहून घेतल्याचा दावा केला जात आहे. लालू यादव 2004 ते 2009 पर्यंत रेल्वे मंत्री होते.

याप्रकरणी सीबीआयने १८ मे रोजी गुन्हा दाखल केला होता. सीबीआयच्या म्हणण्यानुसार, 2004 ते 2009 दरम्यान रेल्वेमंत्री असताना लालू प्रसाद यांनी अनेकांना ग्रुप डीच्या नोकऱ्या दिल्या आणि त्याबदल्यात जमिनी लिहून घेतल्याचा आरोप आहे.

या नोकऱ्या मुंबई (Mumbai) जबलपूर, कोलकाता, जयपूर आणि हाजीपूर झोनमध्ये देण्यात आल्या होत्या.