सोनिया गांधी रुग्णालयात दाखल; प्रकृती स्थिर

नवी दिल्ली : काँग्रेस नेत्या सोनिया गांधी (Sonia Gandhi) यांना कोरोनावरील उपचारासाठी आज सर गंगाराम रुग्णालयात दाखल केले आहे. सध्या त्यांची प्रकृती स्थिर आहे. सोनिया गांधी यांना काही दिवसापूर्वी कोरोनाची (Corona) लागण झाली होती. आज अचानक त्रास होऊ लागल्यानंतर त्यांना सर गंगाराम रुग्णालयात दाखल करण्यात आले आहे, अशी माहिती काँग्रेस प्रवक्ते रणदीप सिंह सुरजेवाला यांनी दिली आहे.

सोनिया गांधी यांना २ जून रोजी कोरोना ची (Corona) लागण झाली, त्यांनी घरीच उपचार घेतले. दरम्यान त्यांना नॅशनल हेराल्ड प्रकरणात ईडीने सोनिया गांधी यांना २३ जून रोजी चौकशीसाठी बोलावले होते. याअगोदर ८ जून रोजी सोनिया गांधी यांना ईडीने चौकशीसाठी बोलावले होते, पण कोरोनाची लागण झाल्यामुळे सोनिया गांधी या तारखेला ईडी कार्यालयात जाऊ शकल्या नाहीत.आता ईडीने त्यांना २३ जूनला बोलावले आहे.

नॅशनल हेराल्ड प्रकरणात राहुल गांधींना ईडीने २ जून रोजी चौकशीसाठी बोलावले होते. यावेळी राहुल गांधी भारता बाहेर होते, त्यामुळे त्यांनी ईडीकडे नवीन तारीख मागितली होती. ईडीने त्यांना १३ जून रोजी चौकशीसाठी बोलावले आहे.