Sharad Yadav Passed Away : जेडीयूचे माजी अध्यक्ष शरद यादव यांचं निधन, वयाच्या ७५ व्या वर्षी घेतला अखेरचा श्वास

Sharad Yadav Passed Away : जेडीयूचे माजी अध्यक्ष शरद यादव यांचे निधन झाले आहे. यादव यांनी वयाच्या ७५ व्या वर्षी अखेरचा श्वास घेतला. बिहारच्या राजकारणात वेगळी ओळख असलेले शरद यादव यांच्या जाण्याने सर्वांनाच दुःख झाले आहे. शरद यादव गेल्या अनेक दिवसांपासून आजारी होते. काल रात्री त्यांना श्वास घेताना त्रास होत होता. त्यानंतर तातडीनं फोर्टीस रुग्णालयात दाखल करण्यात आले. मात्र, काही तासांतच त्यांची प्राणज्योत मालवली.

शरद यादव (Sharad Yadav) यांच्या मुलीनं ट्वीट करत याबाबतची माहिती दिली. पापा नहीं रहे, असं ट्वीट शरद यादव यांच्या मुलीनं केलं आहे. गुरुग्राम येथील फोर्टिंस रुग्णालयात शरद यादव यांनी अखेरचा श्वास घेतला. आज दिवसभर छतरपूर येथील निवासस्थानी त्यांचे पार्थिव दर्शनासाठी ठेवण्यात येणार आहे.

शरद यादव जेडीयूचे (JDU) राष्ट्रीय अध्यक्ष राहिले आहेत. त्यांनी सात वेळा खासदार म्हणून काम पाहिलेय. तसेच त्यांनी उत्तर प्रदेश, मध्य प्रदेश आणि बिहार या तीन राज्यांमधून लोकसभेवर खासदार म्हणून काम केलं. शरद यादव यांनी १९७४ पासून संसदीय राजकारणात खासदार म्हणून पाऊल टाकलं.

राजकीय वर्तुळात शोककळा

शरद यादव यांच्या जाण्याने राजकीय वर्तुळातही शोककळा पसरली आहे. भारताचे पंतप्रधान नरेंद्र मोदी, संरक्षणमंत्री राजनाथ सिंह, काँग्रेसचे माजी अध्यक्ष राहुल गांधी, काँग्रेसचे विद्यमान अध्यक्ष मल्लिकार्जुन खर्गे, बिहारचे माजी मुख्यमंत्री लालू प्रसाद यादव, उपमुख्यमंत्री तेजस्वी यादव यांच्यासह दिग्गजांनी शरद यादव यांना सोशल मीडियाच्या माध्यमातून आदरांजली व्यक्त केली आहे.