Gautam Adani Billionaire List: जगातील टॉप 10 अब्जाधीशांच्या यादीतून गौतम अदानी 'आऊट', अंबानी कुठल्या स्थानी?

Top 10 Billionaires List Gautam Adani - Mukesh Ambani : जगातील टॉप १० अब्जाधीशांच्या यादीतील नावांमध्ये मोठा फेरबदल झाला आहे. बऱ्याच काळापासून या यादीत समावेश असलेले भारतीय उद्योजक गौतम अदानी आणि मुकेश अंबानी हे दोघेही या यादीतून बाहेर झाले आहेत.

अलीकडेच अदानी ग्रुपसंबंधी (Adani Group) अमेरिकी रिसर्च कंपनी हिंडनबर्गचा रिपोर्ट (hindenburg research) प्रसिद्ध झाला होता. त्यानंतर गौतम अदानी यांच्या नेतृत्वातील कंपन्यांचे शेअर दणकून आपटले होते. परिणामी आठवडाभरातच गौतम अदानी हे जगातील टॉप टेन श्रीमंतांच्या यादीतून बाहेर झाले.

अदानींची संपत्ती किती?

हिंडनबर्गच्या अहवालानंतर गौतम अदानींच्या संपत्तीत मोठी घट झाल्याचं पाहायला मिळालं. हा अहवाल प्रसिद्ध झाला त्याला आठवडा उलटला आहे. त्याचा मोठा फटका अदानी ग्रुपला बसला आहे. ब्लूमबर्ग बिलेनिअर्स इंडेक्सनुसार, गौतम अदानी यांच्या एकूण संपत्तीत घट होऊन ती आता ८४.४ अब्ज डॉलर इतकी झाली आहे. त्यामुळे ते आता जगातील श्रीमंतांच्या यादीत अकराव्या स्थानी आहेत.

अदानींच्या कंपन्यांचा MCap घसरला

बिझनेस टुडेनुसार, हिंडनबर्गचा अहवाल प्रसिद्ध झाल्यानंतर अदानी ग्रुपचे शेअर बाजाराच्या सूचीतील सात कंपन्यांच्या समभागांमध्ये मोठी घसरण झाली. त्यामुळे अदानी ग्रुपच्या कंपन्यांच्या एकूण मार्केट कॅपमध्ये केवळ तीन दिवसांत ५.५ लाख कोटी रुपयांची घट झाली आहे.

अदानी टोटल गॅस आणि अदानी ग्रीन एनर्जीच्या समभागांमध्ये गेल्या चार दिवसांत सर्वाधिक २० टक्क्यांपर्यंतची पडझड झाल्याचे बघायला मिळाले.