दुर्देवी! हरियाणातील अंबाला येथे एकाच कुटुंबातील ६ जणांनी केली आत्महत्या

चंदीगड : हरियाणातील (Haryana) अंबाला येथून एक धक्कादायक बातमी समोर आली आहे. येथील एकाच कुटुंबातील ६ जणांचे मृतदेह सापडले आहेत. मृत्यूचे (Death) कारण अद्याप स्पष्ट झालेले नाही. घरातून एक सुसाईड नोट सापडल्याची माहिती पोलिसांनी दिली. सध्या या प्रकरणाचा तपास सुरू आहे. अलीकडेच जम्मूमध्येही अशीच एक घटना समोर आली होती. तिथे दोन वेगवेगळ्या घरात एकाच कुटुंबातील ६ जणांचे मृतदेह सापडले होते.

'दोन मुलांसह एकाच कुटुंबातील ६ जणांचा मृत्यू झाला आहे. क्राईम (Crime) टीमला घटनास्थळी पाचारण करण्यात आले आहे. सुसाईड नोट जप्त करण्यात आली आहे. पुढील तपास सुरू आहे, अशी माहिती अंबालाचे डीएसपी जोगिंदर शर्मा यांनी दिली.

ही घटना बलाना गावातील आहे. संगत राम, महिंद्र कौर (पत्नी), सुखविंदर सिंग (मुलगा), रीना (सुखविंदरची पत्नी) अशी मृतांची नावे आहेत. याशिवाय आशु आणि जस्सी या अल्पवयीन मुलींचाही मृतांमध्ये समावेश आहे. सुखविंदरने आत्महत्या करण्यापूर्वी कुटुंबाला विष पाजल्याची भीती व्यक्त करण्यात येत आहे. तो एका खासगी कंपनीत कामाला होता. मृतदेह पोस्टमॉर्टमसाठी पाठवण्यात आले आहेत.

जम्मू-काश्मिरमध्ये अशीच घटना घडली

नूर-उल-हबीब, सज्जाद अहमद मगरे, सकिना बेगम आणि त्यांची मुलगी नसीमा अख्तर हे सिध्रा येथील पॉश भागात असलेल्या तवी विहारमध्ये मृतावस्थेत आढळले. यावेळी रुबिना बानो आणि तिचा भाऊ जफर सलीम यांचे मृतदेह जवळच्या घरात आढळून आले, अशी माहिती पोलिसांनी दिली आहे. जम्मूचे एसएसपी चंदन कोहली यांनी सांगितले की, घटनेच्या तपासासाठी विशेष तपास पथक स्थापन करण्यात आले आहे.