Airplane Accident: विमानाची ट्रकला धडक, रनवेवर बर्निंग प्लेनचा थरार; पाहा VIDEO

Airplane Accident : पेरूमधील लिमा येथे आंतरराष्ट्रीय विमानतळावर एक विमान धावपट्टीवर टेक ऑफ करताना एक भीषण अपघात झाला. विमान धावपट्टीवर असलेल्या अग्निशमन गाडीला धडकलं. या घटनेत दोन अग्निशमन जवानांचा जागीच मृत्यू झाला. या जोरदार धडकेनंतर विमानाने पेट घेतला आणि काही अंतरावर जाऊन थांबलं. सुदैवानी विमानातील सर्व सुखरुप असून कुणालाही दुखापत झाली नाही.

या अपघाताचा व्हिडीओ सोशल मीडियावर व्हायरल होत आहे. व्हिडीओच्या सुरुवातीला विमानाला मागील बाजूने आग लागल्याचे दिसत आहे. विमान थांबलं तेव्हा आजूबाजूला धुराचं साम्राज्य दिसत होतं. विमान फायर इंजिनला धडकले त्यावेळी या विमानात क्रू मेंबर्ससह एकूण 108 प्रवासी होते. हे विमान पेरूच्या LATAM एअरलाइन्सचे होते.  (Latest Marathi News)

विमानाची आणि फायर इंजिनची धडक झाल्यानंतर विमानाने तत्काळ पेट घेतला. पेटतं विमान धावपट्टीवरुन धावतांना दिसत होतं. आगीच्या ज्वाळा आणि काळा धूर असं थरारक दृष्य धावपट्टीवर दिसत होतं. मात्र वैमानिकाने प्रसंगावधाना दाखवत विमान काही अंतरावर थांबवलं आणि सर्व प्रवाशांना सुखरुप बाहेर काढण्यात आलं.

या घटनेची माहिती देताना LATAM एअरलाइन्सने आपल्या वेबसाईटवर शोक व्यक्त केला. तसेच या अपघातामुळे प्रवाशांना झालेल्या गैरसोयीबद्दल दिलगिरी व्यक्त केली. या प्रवाशांना त्यांच्या निश्चित स्थळी नेण्यासाठी आणखी एका विमानाची व्यवस्था करण्यात आली असून त्यासाठी त्यांना कोणतेही अतिरिक्त भाडे द्यावे लागणार नाही, असे एअरलाइन्सने म्हटले आहे.