नोव्हाक जोकोविचचा व्हिसा पुन्हा रद्द; दुसऱ्यांदा घेतलं ताब्यात

नोव्हाक जोकोविचवरील वाद कमी होण्याऐवजी वाढतच आहे. ऑस्ट्रेलियात दाखल झालेल्या नोवाकला प्रथम विमानतळावर ताब्यात घेण्यात आले, त्यानंतर न्यायालयाने त्याचा व्हिसा रद्द करण्याचा निर्णय अवैध ठरवून त्याची सुटका केली. नोव्हाक जोकोविचने (Novak Djokovic) ऑस्ट्रेलिया ओपनच्या (Australian Open) ड्रॉमध्ये प्रवेश केला, त्याचा पहिला सामनाही ठरला. यानंतर सर्व काही सुरळीत झाल्यासारखे वाटत होते, परंतु त्यानंतर ऑस्ट्रेलियाच्या इमिग्रेशन मंत्र्यांनी आपल्या अधिकारांचा वापर करून पुन्हा एकदा नोव्हाकचा व्हिसा रद्द केला आहे. नोव्हाक जोकोविचला शनिवारी पुन्हा एकदा ताब्यात घेण्यात आले आहे. (Novak Djokovic Case Update News In Marathi)

ऑस्ट्रेलिया ओपन ही मोठी स्पर्धा आहे, नोव्हाकने या स्पर्धेत खेळावे अशी आयोजकांचीही इच्छा होती. नोव्हाकने आधीच सांगितले आहे की तो लसीचे प्रमाणपत्र दाखवणार नाही. मी लस घेतली आहे की नाही हे तो सांगू इच्छित नाही. तेव्हापासून त्याच्या खेळण्याबाबत साशंकता व्यक्त केली जात होती, मात्र त्याने स्वत:हून ऑस्ट्रेलिया ओपनमध्ये भाग घेणार असल्याची माहिती दिली. त्यांनी सांगितले की त्याला काही वैद्यकीय सूट देण्यात आली आहे. याला मोठा विरोध झाला.

ऑस्ट्रेलियाने नोव्हाकचा व्हिसा रद्द केल्याची पुष्टी केली आहे. याबाबत ऑस्ट्रेलियाच्या पंतप्रधानांनाही आपले म्हणणे मांडावे लागले. त्यांनी ट्विट करून लिहिले - नियम हा नियम असतो, नियमापेक्षा कोणीही मोठा नसतो. मिस्टर नोव्हाकचा व्हिसा रद्द करण्यात आला आहे. नोव्हाक जोकोविचला मेलबर्न विमानतळावर बराच वेळ थांबावे लागले. यानंतर नोव्हाकला क्वारंटाईन केलेल्या हॉटेलमध्ये नेण्यात आले. कारण नोव्हाकला त्याच्या देशात परत पाठवण्याची तयारी करण्यात आली होती.

हे प्रकरण न्यायालयात गेल्यावर नोव्हाक जोकोविचला दिलासा मिळाला आणि २४ तासांच्या आत त्याची सुटका करण्याचा निकाल देण्यात आला. नोव्हाकने तयारी सुरू केली, त्याचे नावही ड्रॉमध्ये समाविष्ट झाले. नोव्हाकचा पहिल्या फेरीत त्याचाच देशाचा खेळाडू मिओमिर केमानोविकशी सामना होणार आहे. हा सामना सोमवारी होणार आहे. पण त्याआधी ऑस्ट्रेलियन सरकारने नोव्हाकचा व्हिसा पुन्हा एकदा रद्द केला. नोव्हाकला शनिवारी ताब्यात घेण्यात आले. आता या प्रकरणावर पुन्हा एकदा न्यायालयात सुनावणी होणार आहे.

Edited By: Pravin Dhamale