T-20 Wolrd Cup: ठरलं! हार्दिक पांड्या बाबत BCCI नं घेतला मोठा निर्णय?

भारताचा स्टार अष्टपैलू हार्दिक पांड्या (Hardik Pandya) आगामी टी -20 वर्ल्डकपमध्ये (T-20 World Cup) खूप महत्वाची भूमिका बजावणार आहे, पण स्पर्धा सुरू होण्याआधी त्याच्या गोलंदाजीवर बरीच चर्चा झाली होती, तो गोलंदाजी करेल की नाही. अपेक्षेप्रमाणे हार्दिक पांड्या टी -20 विश्वचषकात भारतासाठी गोलंदाजी करणार नाही. बीसीसीआयच्या (BCCI) वैद्यकीय पथकाने सोमवारी हार्दिकचा फिटनेस अहवाल मुंबई इंडियन्सकडून (MI) घेतला आणि लगेचच मंडळाला कळवले की पांड्या वर्ल्ड कपमध्ये गोलंदाजीसाठी तंदुरुस्त नाही. वैद्यकीय संघाच्या या पुष्टीने बीसीसीआयला टी -20 विश्वचषकासाठी भारतीय संघात बदल करण्यास भाग पाडले आहे.

बीसीसीआयच्या एका शीर्ष अधिकाऱ्याने याला दुजोरा दिला म्हणाले, “हे स्पष्ट आहे, तो (हार्दिक पंड्या) गोलंदाजी करू शकत नाही. तो फलंदाज म्हणून विश्वचषकात खेळेल. तो सावरेल आणि विश्वचषकाच्या नंतरच्या टप्प्यापर्यंत गोलंदाजी करेल पण आत्ता ते शक्य होणार नाही. आम्हाला अक्षर पटेलबद्दल वाईट वाटते, पण संघाचा समतोल राखण्यासाठी शार्दुलचा समावेश केल्याचे अधिकाऱ्यांनी सांगितले.

राष्ट्रीय निवड समितीने बुधवारी डावखूरा फिरकीपटू अक्षर पटेलच्या जागेवर शार्दुल ठाकूरला टी -20 विश्वचषकाच्या 15 जणांच्या भारतीय संघात समाविष्ट करण्याचा निर्णय घेतला आहे. हार्दिकच्या फिटनेसमुळे अक्षर पटेलला संघातील स्थान गमवावे लागले. निवडकर्त्यांनी सुरुवातीला फक्त 3 वेगवान गोलंदाज (जसप्रीत बुमराह, मोहम्मद शमी आणि भुवनेश्वर कुमार) असलेल्या संघाची घोषणा केली. निवडकर्त्यांना विश्वास होता की हार्दिक चौथा वेगवान गोलंदाज म्हणून काम करेल.

हार्दिकच्या गोलंदाजीच्या असमर्थतेमुळे निवडकर्त्यांनी अक्षर पटेलऐवजी शार्दुल ठाकूरचा संघात समावेश केला. शार्दुल गोलंदाजी सोबतच फलंदाजी देखील चांगली करु शकतो. बीसीसीआय चे सचिव जय शाह यांनी एका निवेदनात म्हटले आहे, “अखिल भारतीय वरिष्ठ निवड समितीने संघ व्यवस्थापनाशी चर्चा केल्यानंतर शार्दुल ठाकूरला मुख्य संघात समाविष्ट केले आहे. अष्टपैलू अक्षर पटेल 15 सदस्यीय संघाचा भाग होता पण आता त्याला 'स्टँड बाय' खेळाडूंच्या यादीत टाकले गेले आहे.

Edited By: Pravin Dhamale