IPL 2023: मुंबई इंडियन्सला दुहेरी धक्का! बुमराह पाठोपाठ संघातील प्रमुख परदेशी गोलंदाज IPL स्पर्धेतून बाहेर

JHYE RICHARDSON: आयपीएल २०२३ स्पर्धा सुरु व्हायला अवघे काही दिवस शिल्लक राहिले आहेत. या स्पर्धेसाठी सर्वच संघांनी कसून सरावाला देखील सुरुवात केली आहे. दरम्यान ही स्पर्धा सुरु होण्यापूर्वीच मुंबई इंडियन्स संघाला मोठा धक्का बसण्याची शक्यता आहे.

सध्या भारत विरुध्द ऑस्ट्रेलिया या दोन्ही संघांमध्ये ४ कसोटी सामन्यांची मालिका सुरु आहे. ही मालिका झाल्यानंतर दोन्ही संघ वनडे मालिका खेळण्यासाठी आमने सामने येणार आहेत.

या मालिकेपूर्वी ऑस्ट्रेलियाचा वेगवान गोलंदाज झाय रिचर्डसन दुखापतीमुळे मालिकेतुन बाहेर झाला आहे. तो आयपीएल स्पर्धेत मुंबई इंडियन्स संघाचे प्रतिनिधित्व करतो. (Latest sports updates)

आयपीएल २०२३ स्पर्धेसाठी झालेल्या लिलावात मुंबई इंडियन्स संघाने त्याला १.५ कोटींची बोली लावत आपल्या संघात स्थान दिले होते. त्यामुळे मुंबई इंडियन्स संघाला दुहेरी झटका बसण्याची शक्यता आहे.

झाय रिचर्डसन स्पर्धेतून बाहेर झाल्यास, मुंबई इंडियन्स संघाला वेगवान गोलंदाजाची कमतरता जाणवू शकते. कारण यापूर्वी जसप्रीत बुमराह देखील दुखापतीमुळे आयपीएल स्पर्धेतून बाहेर झाला आहे.

झाय रिचर्डसन हा ४ जानेवारीला शेवटचा सामना खेळण्यासाठी मैदानात उतरला होता. सुरुवातीला ही दुखापत कमी होती मात्र त्यानंतर त्याची दुखापत वाढली. या सामन्यानंतर तो मैदानावर पुनरागमन करू शकला नव्हता.

मात्र आता त्याने क्लब लेव्हल क्रिकेटमधून मैदानावर पुनरागमन करण्याचा प्रयत्न केला. मात्र त्याचा हा प्रयत्न फसला आहे.