IPL 2022: रविंद्र जाडेजानं कर्णधारपद सोडलं, नेतृत्व पुन्हा धोनीकडे; जाणून घ्या कारण

मुंबई: आयपीएलमध्ये (IPL 2022) मोठी घडामोड घडली आहे. अष्टपैलू खेळाडू रविंद्र जाडेजानं चेन्नई सुपरकिंग्जचे कर्णधारपद सोडलं आहे. यंदाच्या मोसमात अपयशी ठरलेल्या चेन्नई संघाचं नेतृत्व पुन्हा कॅप्टन कूल महेंद्रसिंग धोनीकडं देण्यात आलं आहे.

चेन्नई संघाला चार वेळा चॅम्पियन बनवणाऱ्या धोनीनं या आयपीएल हंगामाच्या सुरुवातीलाच कर्णधारपद सोडून सर्वांना आश्चर्याचा धक्का दिला होता. त्यावेळी संघ व्यवस्थापनानं संघाचं नेतृत्व अनुभवी अष्टपैलू खेळाडू रविंद्र जाडेजाकडे दिलं होतं. मात्र, कर्णधारपद मिळाल्यानंतर जाडेजा सुरुवातीपासून दबावात खेळत असल्याचं दिसून आलं. परिणामी त्याच्या नेतृत्वाची चुणूक दिसून आली नाही. याशिवाय फलंदाजी, गोलंदाजी आणि क्षेत्ररक्षणातही तो विशेष कामगिरी करू शकला नाही. आपल्या फलंदाजीवर लक्ष्य केंद्रीत करण्यासाठीच त्यानं कर्णधारपद सोडल्याचं सांगण्यात येत आहे.