WPL 2023: शेवटच्या षटकात DRS.. WPLच्या 'या' नव्या नियमामुळे भंगले गुजरातच्या पहिल्या विजयाचे स्वप्न

GG VS UPW: विमेन्स प्रीमियर लीग स्पर्धेत रविवारी रोमांचक सामना पार पडला. या सामन्यात युपी वॉरियर्स आणि गुजरात जायंट्स हे दोन्ही संघ आमने सामने होते. या रोमांचक सामन्याचा निकाल शेवटच्या षटकात लागला. युपी वॉरियर्स संघातील फलंदाजाने षटकार मारून आपल्या संघाला विजय मिळवून दिला.

या सामन्यात युपी वॉरियर्स संघातील फलंदाज ग्रेस हॅरिसने तुफानी खेळी केली. तिने शेवटच्या षटकात १९ धावांची गरज असताना तुफानी खेळी केली आणि आपल्या संघाला विजय मिळवून दिला. यादरम्यान युपी वॅरियर्स संघासाठी विमेन्स प्रीमियर लीग स्पर्धेतील एक नियम फायदेशीर ठरला आहे. (Latest sports updates)

विमेन्स प्रीमियर लीग स्पर्धेत काही नवे नियम लागू करण्यात आले आहेत. या स्पर्धेत वाईड किंवा नो चेंडूसाठी देखील खेळाडू डीआरएसची मागणी करू शकणार आहेत. शेवटचे षटक सुरु असताना जेव्हा अंपायरने वाईड चेंडू देण्यास नकार दिला, त्यावेळी ग्रेस हॅरिसने डीआरएसची मागणी केली. डीआरएसमध्ये पाहिलं असता चेंडू वाईड असल्याचे दिसून आले होते. त्यामुळे अंपायरला आपला निर्णय बदलावा लागला.

शेवटच्या षटकात काय घडलं?

१९.१ : ६ धावा

१९.२ : वाईड चेंडू (गुजरातने केली डीआरएसची मागणी)

१९.२ : २ धावा

१९.३ : ४ धावा

१९.४ : वाईड चेंडू ( युपीने केली डीआरएसची मागणी)

१९.४: ४ धावा

१९.५ : ६ धावा

या सामन्यात गुजरात जायंट्स संघाने प्रथम फलंदाजी करताना १६९ धावा केल्या होत्या. हे आव्हान युपी वॅरियर्स संघाने १ चेंडू शिल्लक ठेऊन पूर्ण केले. या स्पर्धेत खेळाडू वाईड आणि नो चेंडूसाठी देखील डीआरएसची मागणी करू शकणार आहेत.

यापूर्वी केवळ फलंदाज बाद आहे की नाही हे पाहण्यासाठी डीआरएसची मागणी केली जायची. मात्र विमेन्स प्रीमियर लीग स्पर्धेत नवीन प्रयोग केला जात आहे. हा प्रयत्न जर यशस्वी ठरला तर आयपीएल स्पर्धेत देखील हा नियम लागू केला जाऊ शकतो.