WTC Final: टीम इंडियाची चिंता वाढली! श्रीलंका करणार WTC च्या फायनलमध्ये प्रवेश?

WTC FINAL NZ VS SL : ऑस्ट्रेलिया संघ हा वर्ल्ड टेस्ट चॅम्पियनशिप २०२३ स्पर्धेच्या अंतिम सामन्यात प्रवेश करणारा पहिला संघ ठरला आहे. तर अंतिम फेरीत प्रवेश करण्यासाठी भारत आणि श्रीलंका या दोन्ही संघांमध्ये चुरशीची लढत पाहायला मिळत आहे.

भारतीय संघ अहमदाबादच्या मैदानावर ऑस्ट्रेलिया संघाविरुध्द चौथा कसोटी सामना खेळत आहे. तर क्राईस्टचर्चच्या मैदानावर सुरु असलेल्या न्यूझीलंड विरुध्द श्रीलंकेच्या सामन्याने भारतीय संघाची चिंता वाढवली आहे. (Latest sports updates)

श्रीलंका संघाने न्यूझीलंड संघाला विजयासाठी २८५ धावांचे आव्हान दिले आहे. या सामन्याच्या शेवटच्या दिवशी न्यूझीलंड संघाला विजयासाठी २५७ धावांची गरज असणार आहे. न्यूझीलंड संघाचा एक फलंदाज बाद होऊन माघारी परतला आहे.

जर श्रीलंका संघाला अंतिम फेरीत प्रवेश करायचा असेल तर दोन्ही कसोटी सामन्यांमध्ये विजय मिळवावा लागणार आहे. भारत विरुध्द ऑस्ट्रेलिया यांच्यातील चौथा कसोटी सामना अनिर्णित राहावा अशी प्रार्थना देखील करावी लागणार आहे.

तसेच वर्ल्ड टेस्ट चॅम्पियनशिपच्या गुणतालिकेबद्दल बोलायचे झाले तर ऑस्ट्रेलियाचा संघ सध्या अव्वल स्थानी आहे. ऑस्ट्रेलियाने अंतिम फेरीत प्रवेश केला आहे. भारतीय संघ ६०.२९ टक्के गुणांसह दुसऱ्या स्थानी आहे.

तर श्रीलंका संघ ५३.३३ टक्के गुणांसह तिसऱ्या स्थानी आहे. भारतीय संघाने जर चौथ्या कसोटीत विजय मिळवला तर भारतीय संघ अंतिम फेरीत प्रवेश करेल. जर ऑस्ट्रेलियाने विजय मिळवला किंवा सामना अनिर्णित राहिला तर श्रीलंका संघ अंतिम फेरीत जाण्याची शक्यता वाढणार आहे.

श्रीलंकेने दिलेल्या धावांचा पाठलाग करताना न्यूझीलंड संघाला हवी तशी कामगिरी करता आली नाहीये. डेव्हॉन कॉन्वे अवघ्या ५ धावा करत माघारी परतला आहे. अवघ्या ९ धावसंख्येवर पहिला गडी बाद झाल्यानंतर केन विलियमसन आणि टॉम लेथम यांनी डाव सावरला.

चौथ्या दिवस अखेर दोघेही खेळपट्टीवर टिकून आहे. शेवटच्या दिवशी दोघांकडूनही चांगल्या कामगिरीची अपेक्षा असणार आहे.