Saam Impact News: बीड जिल्ह्यात अडकलले मजुर धडगावी परतले; मजुरांचे कामाचे पैसेही मिळाले परत

सागर निकवाडे

नंदूरबार : धडगाव तालुक्यातील राडीकलम, घाटली, खामला, बोदला, मांडवी, वलवाल आणि सोन बुद्रुक येथील रहिवासी असलेल्या ४० कामगार बीड (Beed) जिल्‍ह्यात अडकले होते. याबाबत ‘साम टीव्‍ही’ने लावलेल्‍या बातमीनंतर या सर्व मजुरांना त्‍यांच्‍या मजूरीचे पैसे मिळून त्‍यांची सुटका झाली. यानंतर ते धडगाव (Nandurbar News) येथे परतले आहेत. (Latest Marathi News)

बीड जिल्ह्यातील येथील वाघोरा (ता.माझलगाव) येथे एका खाजगी प्रोडक्ट आणि ओईल कंपनीच्या ठेकेदारांकडे धडगाव तालुक्‍यातील काही मजूर कामासाठी गेले होते. ठेकेदाराकडे ठरल्याप्रमाणे मजुरांना मजुरी न देता कमी मजुरी आणि दैनंदिन हजेरी कमी दाखवून, दोन शिप्टच्या ड्युटीची नोंद न करता मजुरांची पिळवणूक करत असल्याचा प्रकार समोर आला. ठरल्याप्रमाणे मजुरी मिळावी व तेथून सुटका व्हावी. यासाठी मजूर तालुका प्रशासनाला विनंती करत असल्याचा व्हिडियो (Saam Impact) साम टिव्ही ला मिळाला होता. त्यानंतर आदिवासी जनजागृतीने टीम त्याचा प्रशासकीय पातळीवर पाठपुरावा करत आलेल्या व्हिडीओच्या आधारे बातमी प्रसारित केली.

प्रशासनाच्या मदतीने मजुरांची सुटका करण्यात यश मिळाले असून २४ तासाचा प्रवास करत सर्व मजूर धडगाव येथे आपआपल्या घरी सुखरूप पोहचले. अडकलेल्या मजुरांमध्ये लहान बालके, महिला आणि पुरुष मिळून एकूण २९ नागरिकांची सुटका झाली. उर्वरित मजुरांचे मजुरी लवकरच देणार असून त्याकरिता ७ मजूर वाघोरा येथे थांबले असल्याची माहिती पिडीत मजूर दिनेश पावरा यांनी माहिती दिली. सदर मजुरांची सुटका करण्यासाठी आदिवासी जनजागृतीसह तालुका प्रशासनाने अक्राणी तालुक्याचे तहसीलदार के. एन. गावित यांनी सहकार्य केले.